Chaitra Ekadashi : नदीपात्रात स्वच्छ पाणी राहील याची दक्षता घ्यावी

Pandharpur News : चैत्र शुद्ध एकादशी येत्या ८ एप्रिलला आहे. या यात्रा कालावधीत २ ते १२ एप्रिल दरम्यान श्री विठ्ठल- रुक्मिणी दर्शनासाठी मोठ्या प्रमाणात भाविक येतात. यात्रेत भाविक व वारकऱ्यांसाठी चंद्रभागेचे स्नान फार पवित्र मानले जाते. श्री विठ्ठल- रुक्मिणीमातेचे दर्शन घेण्यापूर्वी भाविक चंद्रभागा स्नान करतात.

तसेच त्यामुळे येणाऱ्या भाविकांना चंद्रभागा नदी पात्रात पवित्र स्नान करता यावे, यासाठी संबंधित विभागाने चंद्रभागा नदीपात्रात मुबलक व स्वच्छ पाणी राहील, याची दक्षता घेऊन नियोजन करावे, अशा सूचना प्रांताधिकारी सचिन इथापे यांनी दिल्या.

चैत्री वारी नियोजनाबाबत प्रांत कार्यालय, पंढरपूर येथे बैठक घेण्यात आली. बैठकीस तहसीलदार सचिन लंगुटे, गटविकास अधिकारी सुशिल संसारे, मुख्याधिकारी प्रशांत जाधव, पोलिस निरिक्षक विश्वजित घोडके, मंदिर समितीचे व्यवस्थापक मनोज श्रोत्री, महावितरणचे अतिरिक्त कार्यकारी अभियंता जी.एस.भोळे यांच्यासह संबंधित विभागाचे अधिकारी उपस्थित होते.

प्रांताधिकारी इथापे म्हणाले, पंढरपुरात चैत्री यात्रा कालावधीत तीन ते चार लाख भाविक येतात. या यात्रेत भाविकांच्या आरोग्य सुरक्षेला व स्वच्छतेला प्राधान्य द्यावे. नगरपालिका प्रशासनाने शहरातील अतिक्रमणे तत्काळ काढावीत. मुबलक स्वच्छ पिण्याच्या पाण्याचा पुरवठा करावा. नदीपात्रात कोणतेही खासगी वाहने जाणार नाहीत याची दक्षता घ्यावी.

आवश्यक ठिकाणी बॅरेकेटींग करावे. दर्शनरांगेतील भाविकांना उन्हाचा त्रास जाणवू नये यासाठी मंदिर समितीने आवश्यक उपाययोजना कराव्यात. आरोग्य विभागाने तज्ञ डॉक्टरांसह वैद्यकीय पथकाची नेमणूक करावी. तसेच मुबलक औषधसाठा उपलब्ध राहील, याबाबत नियोजन करावे. यात्रा कालावधीत येणाऱ्या भाविकांना स्वच्छ पिण्याचे पाणी मिळावे यासाठी बोअरवेल, हातपंपाची पाणी तपासणी करण्यात यावी, असेही त्यांनी सांगितले.