PM Crop Insurance: विमा परताव्यासाठी केंद्राचा सोमवारी देशव्यापी कार्यक्रम

Nanded News: केंद्रीय कृषी व शेतकरी कल्याण मंत्रालयाने पंतप्रधान पीकविमा योजना, हवामानावर आधारित पीकविमा योजनेअंतर्गत खरीप व रब्बी २०२४-२५ हंगामातील, तसेच मागील हंगामातील दाव्यांचा निपटारा डीबीटी पद्धतीने करण्याचा निर्णय घेतला आहे. याअंतर्गत पात्र शेतकऱ्यांच्या बँक खात्यात थेट रक्कम जमा करण्यात येणार आहे.

यासाठी सोमवारी (ता. ११) राजस्थानातील झुंझुनू येथे कार्यक्रम आयोजित केला आहे. या कार्यक्रमास केंद्रीय कृषी व शेतकरी कल्याणमंत्री शिवराजसिंह चौहान आणि राजस्थानचे मुख्यमंत्री भजनलाल शर्मा उपस्थित राहणार आहेत.

मागील वर्षी देशभरात राबविण्यात आलेल्या पंतप्रधान पीकविमा योजनेअंतर्गत नुकसानग्रस्त शेतकऱ्यांना परतावा मिळाला नव्हता. हा विमा परतावा मिळावा, यासाठी अनेक ठिकाणी आंदोलन झाली. परंतु केंद्र शासन मात्र पीएम शेतकरी सन्मान निधी योजनेच्या धर्तीवर एखादा मोठा कार्यक्रम करण्याच्या तयारीत होते. यानुसार खरीप व रब्बी २०२४-२५ हंगामातील तसेच मागील हंगामातील दाव्यांचा निपटारा डीबीटी पद्धतीने करण्याचा निर्णय घेतला आहे. यासाठी केंद्र शासनाने विमा कंपन्यांसाठी खास सूचना दिल्या आहेत.

यात विमा कंपन्यांनी दावा रक्कम मंजुरी, दावा लॉट तयार करणे, लॉटचे डिजिटल स्वाक्षरीकरण, डीबीटी प्रक्रियेची सुरुवात, सर्व प्रक्रिया ठरलेल्या तारखेनुसार पूर्ण होणे आवश्यक आहे. जेणेकरून शेतकऱ्यांना दावा रक्कम वेळेत वितरित होईल. यासोबतच राज्य व केंद्रशासित प्रदेशांनी सबसिडीची पूर्ण किंवा अंशतः रक्कम न भरलेली असेल, त्यांच्या बाबतीतही पात्र शेतकऱ्यांना त्यांचा दावा प्रो-राटा पद्धतीने देणे बंधनकारक असल्याचे म्हटले आहे.

यासाठी निधी साठा तयार ठेवणे, सर्व विमा कंपन्यांनी एनसीआयपीशी संलग्न डेबिट खात्यात पुरेशी रक्कम आगाऊ ठेवावी, जेणेकरून फक्त एक बटण दाबताच शेतकऱ्यांच्या खात्यात दावा रक्कम तत्काळ जमा होईल, असेही पत्रात म्हटले आहे. रब्बी हंगामातील तपशील गुरुवारपर्यंत देणे आवश्यक सर्व विमा कंपन्यांनी २०२२ ते २०२४-२५ रब्बी हंगाम या कालावधीतील मागील हंगामाचे दावा तपशील गुरुवारपर्यंत दिलेल्या ई-मेलवर सादर करणे आवश्यक असल्याचे पत्रात म्हटले आहे.