Rural Roads: सीमावादामुळे सांडोळ-महांडोळ येथील रस्त्याची दैना, नागरिक त्रस्त

Latur News: लातूर जिल्ह्यातील उदगीर तालुक्याच्या सीमेवरील सांडोळ, महांडोळ गावे अनेक वर्षांपासून विकासापासून कोसो दूर आहेत. अहमदपूर व चाकूरचे आमदार तसेच उदगीरचे आमदार यांच्यातील मतभेदाचा फटका थेट सांडोळ-महांडोळ रस्त्याला बसला आहे.

या दोघांच्या राजकीय कुरघोडीत सांडोळ गावातील जनतेला अजूनही अपुऱ्या सुविधांमुळे तिष्ठत जीवन जगावे लागत आहे. स्वातंत्र्य मिळून ७५ वर्षे झाली, तरी या गावाला साधा डांबरी रस्ताही लाभलेला नाही, हे लाजिरवाणे चित्र आहे.

गावकऱ्यांनी वारंवार प्रशासनाकडे, स्थानिक लोकप्रतिनिधींकडे तक्रारी करूनही कोणतीही ठोस कारवाई झालेली नाही. कारण सांडोळ व महांडोळ ही दोन्ही गावे विधानसभा मतदारसंघातील शेवटची गावे आहेत. त्यामुळे जबाबदारी टोलविण्याचे राजकारण इथे सुरू असते.

एकमेकांवर दोष टाकण्यात वेळ घालविणारे लोकप्रतिनिधी या गावातील मूलभूत गरजा पूर्ण करण्यात पूर्णपणे अपयशी ठरले आहेत. स्थानिक ग्रामस्थांनी अनेकवेळा आंदोलने केली, तहसीलदारांना निवेदने दिली; पण केवळ आश्वासनांवरच निभावले गेले.

सध्या ग्रामपंचायतीकडे निधीचा अभाव असून, जिल्हा परिषदेच्या माध्यमातूनही कोणतीच मदत मिळालेली नाही. शासनाच्या ग्रामीण रस्ते विकास योजनेत या रस्त्याचा समावेश होण्याची मागणीही अनेकदा करण्यात आली. पण, अद्याप प्रत्यक्षात काहीच घडलेले नाही. या भागातील तरुणवर्ग शहराकडे स्थलांतर करत आहे. रोजगार, शिक्षण आणि आरोग्याच्या सुविधा नसल्याने प्रत्येक गोष्टीसाठी उदगीर विधानसभा मतदारसंघातील हेर या गावात जावे लागते.