Pune News : पुणे बाजार समितीत हापूस आंब्याची आवक वाढत आहे. आवक वाढल्याने पेट्या लावण्यासाठी अडत्यांकडून अतिरिक्त जागेची मागणी प्रशासनाकडे केली जात आहे. संचालकांना बिनदिक्कत १० गुंठे जागा विनामोबदला म्हणून वापरण्यास दिली जात आहे.
मात्र सर्वसामान्य अडत्यांवर जास्तीचा शेतीमाल १५ फुटांच्या बाहेर लावल्याचे कारण देत दंडात्मक कारवाई केली जात असून, प्रशासन सापत्न वागणूक देत असल्याचा आरोप अडते असोसिएशनचे मजी अध्यक्ष युवराज काची यांनी पत्रकार परिषदेत केला.
फळ भाजीपाला मुख्य गेट नंबर १ च्या उजव्या बाजूला ‘थेट शेतकरी ग्राहक’ विक्रीसाठी अंदाजे दहा ते पंधरा गुंठे जागा राखून ठेवण्यात आली आहे. मात्र बाजार समितीने अडते असोसिएशनच्या अध्यक्षांना शेतीमाल विक्रीसाठी ही जागा उपलब्ध करून दिल्याने आश्चर्य व्यक्त केले जात आहे. काही अडत्यांकडे शेतीमाल जास्त येतो. त्यामुळे अनेकदा जागेअभावी तो शेतीमाल पंधरा फुटांच्या पुढे जातो.
त्यामुळे वाहतूक कोंडी होत असल्याचा दावा करत बाजार समिती १८ टक्के जीएसटीसह ५ हजार ९०० रुपयांची दंडात्मक कारवाई करत आहे. एका बाजूला बाजार समिती शेतकऱ्यांसाठी आहे, असे म्हटले जाते आणि दुसऱ्या बाजूला त्यांच्याच शेतीमालाचे नुकसानही केले जात असल्याचाही आरोप काची यांनी केला. तर माझा कोणताही शेतीमाल १५ फुटांच्या बाहेर नसताना देखील दंडात्मक कारवाई केल्याचा आरोपही काची यांनी केला.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.