Mahua Flower : मोहफुलांच्या प्रक्रियेआड व्यसनाधीनतेचा डाव उधळला

Gadchiroli News : मोहफुलाच्या मूल्यवर्धनातून आदिवासींची आर्थिक सक्षमता अशा गोंडस शब्दाआड गडचिरोली जिल्ह्यात मोहफुलांपासून दारू तयार करण्याच्या कारखान्याला मान्यता देण्यात आली होती. मात्र ज्येष्ठ सामाजिक कार्यकर्ते अभय बंग यांच्या नेतृत्वात या विरोधात मोहीम छेडण्यात आली. तब्बल १४०० गावांनी या विरोधात ठराव केले. त्यामुळे अखेरीस शासनाला हा निर्णय मागे घ्यावा लागला. लोकशक्‍तीचा हा मोठा विजय मानला जात आहे.

नक्षल आणि आदिवासीप्रवण असलेल्या गडचिरोली जिल्ह्यात अनेक शतकांपासून दारूबंदी आहे. परिणामी या ठिकाणी व्यसनाधीनता देखील नियंत्रणात आहे. असे असतानाच शासनाने या भागात मिळणाऱ्या मोहफुलांवर प्रक्रिया झाल्यास त्यातून रोजगार निर्मिती होईल, असा विचार मांडला. त्याआड शासनाला या परिसरात मोहफुलांपासून दारू तयार करून त्याची विक्री करायची होती. परंतु याला विरोध होईल या शक्‍यतेने या संदर्भाने कमालीची गुप्तता पाळण्यात आली.

अन्न व औषध प्रशासन मंत्री तसेच गडचिरोली जिल्ह्याचे पालकमंत्री धर्मरावबाबा आत्राम यांच्या हस्ते या प्रकल्पाचे गुपचूप भूमिपूजनही आटोपण्यात आले. शासनाकडून हा प्रकल्प सुरू करण्याची घाई होत असल्याने त्यांचा हेतू स्पष्ट होत होता, असे सामाजिक कार्यकर्ते अभय बंग यांनी सांगितले.

परिणामी अभय बंग यांच्या नेतृत्वात या विरोधात मोहीम उघडण्यात आली. गावागावात जागृती करून ठराव घेत ते शासनाला पाठविण्यात आले. गडचिरोली जिल्ह्यातील तब्बल १४०० गावांनी असे ठराव घेतले. त्यासोबतच या गावातील ८५ हजार व्यक्‍तींनी विरोधाचे पत्र शासनाला पाठविले. यामुळे शासनाला अखेर नमते घ्यावे लागले. त्यानंतरच्या काळात जिल्हाधिकाऱ्यांनी या प्रकल्पाची मान्यता रद्द केल्याचे जाहीर केले. त्यामुळे लोकशक्‍तीचा हा मोठा विजय मानला जात आहे. चंद्रपूर जिल्ह्यात देखील तत्कालीन सरकारकडून दारूबंदी लादण्यात आली होती. त्यानंतर भाजपकडून येथील दारूबंदी उठविली.

प्राप्तीसाठी काही पण ...

चंद्रपूर जिल्ह्यात देखील तत्कालीन सरकारकडून दारूबंदी लादण्यात आली होती. त्यानंतर भाजपकडून येथील दारूबंदी उठविण्यात आली. त्यावरूनच महसूल प्राप्तीआड नागरिकांना व्यसनी बनविण्यासाठी पुढाकार घेतला जात असल्याचा आरोप सरकारवर या पार्श्‍वभूमीवर होत आहे.