Banana Crop Loss: नांदेडमध्ये काढणीला आलेल्या केळी बागा भुईसपाट

Nanded News: वादळी वाऱ्यासह झालेल्या मुसळधार पावसामुळे सोमवारी (ता. ९) नांदेड जिल्ह्यातील अर्धापूर, मुदखेड, भोकर, नांदेड या तालुक्यांतील हजारो हेक्टरवरील केळी बागा भुईसपाट झाल्या. याबाबत जिल्हा प्रशासनाने नुकसानीचा आढावा घेऊन पिकांचे पंचनामे करण्याचे आदेश दिल्याची माहिती कृषी विभागाकडून मिळाली.

नांदेड जिल्ह्यात सोमवारी (ता. ९) सायंकाळी सातच्या सुमारास वादळी वाऱ्यासह मुसळधार पावसाला सुरुवात झाली. या पावसाबरोबरच वाऱ्याचे प्रमाण अधिक असल्याने अनेकांच्या घरांवरील पत्रे उडाले. तर झाडेही उन्मळून पडली. वाऱ्याचा वेग जास्त असल्यामुळे कापणीला आलेल्या केळी बागा आडव्या पडल्या आहेत.

यामुळे जिल्ह्यातील अर्धापूर, मुदखेड, भोकर, नांदेड या तालुक्यातील केळी उत्पादक शेतकऱ्यांना फटका बसला. जूनमध्ये नांदेड जिल्ह्यातील केळीच्या बागा कापणीला येतात. अशावेळी वाऱ्यामुळे बागा भुईसपाट झाल्यामुळे शेतकऱ्यांचे मोठे नुकसान झाले.

वादळाचा फटका मुदखेड तालुक्यातील बारड, निवघा, आंबेगाव, मुगट, डोंगरगाव, शेंबोली, नागेली, अर्धापूर तालुक्यातील पांगरी, पार्डी, शेणी, लहान-लोण यासह नांदेड व भोकर तालुक्यातील काही गावांना बसला आहे.

केळीच्या नुकसानीबाबत माजी मुख्यमंत्री अशोक चव्हाण यांनी प्रशासनाशी संपर्क साधून नुकसानीचे पंचनामे करण्याचे निर्देश दिले. जिल्हाधिकारी राहुल कर्डिले यांनी सोमवारी झालेल्या नेसर्गिक आपत्तीचा आढावा घेऊन पंचनामे करण्याचे निर्देश दिले आहेत.

सोमवारी जिल्ह्यातील नऊ मंडलांत अतिवृष्टीची नोंद झाली. यात कंधार तालुक्यातील कंधार मंडलात ८५.७५ मिमी, कुरुळा ८६, फूलवळ ६८.७५, उस्माननगर ८१.७५, लोहा तालुक्यातील लोहा मंडल ८१.७५, सोनखेड ८१.७५, कलंबर ८१.७५ व किनवमधील जलधारा ७२.७५, शिवणी ६९.२५ मिमी पावसाची नोंद झाली.