Banana Orchard : नगरमध्ये तयार केळी बागा वादळात उद्ध्वस्त

Nagar News : पंधरा दिवस, महिनाभरात केळीची विक्री करायची होती. त्या अनुषंगाने व्यापाऱ्यांशी बोलणेही सुरू होते. मात्र अचानक संकट आले. कसलाही मागमूस नसताना जोरदार वादळ आले.

वादळाने झाडांसह बहुतांश केळीची झाडे जागेवर मोडून पडली आणि तासभरातील वादळाने केळी उत्पादक शेतकऱ्यांना उद्‌ध्वस्त केले. या भागात सुमारे सव्वाशे एकरांपेक्षा अधिक क्षेत्रावरील केळी बागा वादळाने मोडल्या आहेत.

शेवगाव तालुक्यातील रांजणी, दहिगावने, खामगाव, भावी निमगाव, मठाचीवाडी, दहिफळ, शहर टाकळी, घेवरी भागांतील शेतकऱ्यांची ही हतबलता त्रस्त करणारी आहे.

या भागात वादळाने नुकसान झाल्यामुळे केळी उत्पादकांना सुमारे अडीच ते तीन कोटींचा फटका बसल्याचा अंदाज शेतकरी व्यक्त करत आहे. नगर जिल्ह्यातील राहाता, राहुरी, नेवासा भागातही काही ठिकाणी केळीला वादळाचा फटका बसला आहे.

नगर जिल्ह्यातील शेवगाव व नेवासा तालुक्यांच्या पूर्व भागाला औरंगाबाद जिल्ह्यातील जायकवाडी प्रकल्पाचा बॅकवॉटर आहे. त्यामुळे रांजणी, दहिगावने, खामगाव, भावी निमगाव, मठाचीवाडी, दहिफळ, शहर टाकळी, घेवरी आदी भागाला जायकवाडीचा आधार मिळत असल्याने वेगवेगळी पिके घेऊन शेतकरी शेतीत प्रयोग करतात.

केळीचे अनेक वर्षांपासून येथे पीक घेतले जाते. चार दिवसांपूर्वी नगर जिल्ह्यात अचानक पूर्वमोसमी पाऊस व वादळ झाले. पावसापेक्षा वादळच अधिक होते.

बहुतांश बागा ७० टक्क्यांपेक्षा अधिक मोडून पडल्या आहेत. त्यामुळे शासनाने मदत करून केळी उत्पादकांना सावरण्याची गरज आहे, असे रांजणी येथील शेतकरी बाबासाहेब दत्तू माताडे, आबासाहेब माताडे, कैलास कर्डिले, अशोक दगडू उगले, ज्ञानेश्‍वर निवृत्ती गायके, भगवान भानुदास चव्हाण यांच्यासह अन्य नुकसानग्रस्त केळी उत्पादक शेतकऱ्यांनी केली आहे.

विमा मिळाला पाहिजे

शासनाने केळीचा पीकविम्यात समावेश करावा अशी मागणी दहिगावने (ता. शेवगाव) येथील सेवा सोसायटीचे अध्यक्ष व केळी उत्पादक शेतकरी बाळासाहेब मरकड, उपसरपंच राजाभाऊ पाऊलबुद्धे, विलास लोखंडे यांच्यासह यांच्यासह परिसरातील शेतकऱ्यांनी केली आहे.