Amravati Political News : अमरावती जिल्ह्याच्या विकासासाठी सदैव तत्पर असलेल्या नवनीत राणा यांच्या पराभवासाठी अचलपूरचे आमदार बच्चू कडू यांनी सुपारी घेतली होती, असा आरोप आमदार रवी राणा यांनी सोमवारी (ता. १७) केला. त्यामुळे आमदार राणा व आमदार बच्चू कडू यांच्यातील वाद पुन्हा एकदा पेटण्याचे संकेत आहेत.
‘प्रहार’चा उमेदवार रिंगणातून मागे घेण्यासाठी त्यांनी आपल्याशी सुद्धा डील करण्याचा प्रयत्न केला होता. निवडणूक लढविण्यासाठी त्यांना कुठून रसद मिळाली, याचे पुरावे आपल्याजवळ असून योग्य वेळी ते जनतेसमोर मांडू. विकासाला अडसर ठरलेल्यांना जनताच विधानसभा निवडणुकीत जागा दाखवेल, असे आमदार रवी राणा म्हणाले.
अमरावती लोकसभा निवडणुकीत महायुतीच्या उमेदवार नवनीत राणा यांच्या पराभवानंतर आमदार राणा यांनी प्रथमच आपली भूमिका प्रसार माध्यमांसमोर मांडली. राणा म्हणाले, झालेला पराभव हा आमच्यासाठी धक्कादायक आहे. त्याचे आम्ही आत्मचिंतन करीत आहोत.
नवनीत राणा या जिल्ह्याच्या खासदार बनल्या असत्या तर कदाचित पंतप्रधान नरेंद्र मोदी यांच्या मंत्रिमंडळात त्यांची वर्णी लागून अमरावतीचा विकासरथ अधिक गतीमान झाला असता. मात्र विकासाच्या आड आलेल्या स्वार्थी मंडळींनी विकासाचा घात केला.
लोकसभा निवडणुकीत भाजपच्या स्थानिक नेत्यांनी नवनीत राणा यांचे काम केले नसल्याच्या प्रश्नावर ते म्हणाले, महायुतीच्या नेत्यांचे आम्ही आभारी आहोत. कुणी काम केले किंवा नाही केले, हा भाजपचा अंतर्गत प्रश्न आहे.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.