Soil Conservation : ‘भूमी सुपोषण-संरक्षण’चा दीडशे गावांत संकल्प

Pune News : ‘‘अनियंत्रित खत आणि पाण्याच्या वापरामुळे जमिनीची सुपीकता कमी होत चालली आहे. ती टिकवून ठेवण्यासाठी सेंद्रिय खतांचा पुरेसा वापर आवश्यक आहे. याबाबत लोकांमध्ये जागृती करण्यासाठी अक्षय कृषी परिवाराच्या वतीने पश्‍चिम महाराष्ट्रातील १५० गावांमध्ये भूमी सुपोषणासाठी व्यापक जनजागृती अभियान राबविण्यात येत आहे,’’ अशी माहिती कृषिभूषण जगन्नाथ मगर यांनी दिली.

गोसेवा गतीविधी पश्‍चिम महाराष्ट्र प्रांत गो-आधारित शेती सहप्रमुख पूनम राऊत, मधुकर भोसले हे या वेळी उपस्थित होते. श्री. मगर म्हणाले, ‘‘पीक उत्पादन वाढीसाठी जमिनीची सुपीकता महत्त्वाची आहे. आपल्याकडील जमिनीची धूप होत आहे.

सेंद्रिय कर्ब कमी होत चालला आहे. यासाठी जमिनीचे योग्य पद्धतीने संवर्धन आवश्यक आहे. हे लक्षात घेऊन देशातील विविध प्रमुख संस्थांनी एकत्र येऊन भूमी सुपोषणासाठी विशेष मोहीम हाती घेतली आहे.

हजारो गावांमध्ये भूमिपूजन कार्यक्रमाद्वारे मृदा पोषण आणि संवर्धन कार्याला चालना देण्यात आली आहे.’’ राऊत म्हणाल्या, ‘‘जमीन सुपीकता आणि मनुष्य, पशूंचे आरोग्य जपण्यासाठी शेतकऱ्यांमध्ये जनजागृती करण्याची मोहीम सुरू आहे.

यासाठी सेंद्रिय खतांचा वापर, एकात्मिक पीक पद्धती, पीक पोषण याबाबत मार्गदर्शन करण्यात येणार आहे. प्रयोगशील शेतकऱ्यांसाठी पीक स्पर्धेचे देखील आयोजन करण्यात येईल.’’