Dengue Prevention: डेंगी प्रतिरोध दिनानिमित्त जनजागृती 

Nashik News: दर वर्षी जुलै महिन्यात ‘डेंगी प्रतिरोध दिन’ साजरा करण्यात येतो. केंद्र शासनाच्या मार्गदर्शक सूचनेनुसार, यंदा निफाड तालुक्यातील उपजिल्हा रुग्णालय निफाड व तालुका आरोग्य विभाग, पंचायत समिती निफाड यांच्या संयुक्त विद्यमाने डेंग्यू आजाराबाबत जनजागृती उपक्रम राबविण्यात येणार आहे.

उपजिल्हा रुग्णालयाचे वैद्यकीय अधीक्षक डॉ. राजीव तांभाळे यांनी सांगितले की, डेंगी हा डासांद्वारे पसरणारा विषाणूजन्य आजार असून पावसाळ्यात त्याचा प्रादुर्भाव मोठ्या प्रमाणात वाढतो. त्यामुळे नागरिकांमध्ये जनजागृती करून प्रतिबंधात्मक उपायांची अंमलबजावणी करण्यासाठी डेंगी प्रतिरोध दिन साजरा केला जातो.

या अनुषंगाने, गाव पातळीवर आरोग्य कर्मचारी व आशा स्वयंसेविकांच्या माध्यमातून साथरोग नियंत्रणासाठी कीटकशास्त्रीय सर्वेक्षण राबविण्याचे आदेश देण्यात आले आहेत. तालुका आरोग्य अधिकारी डॉ. सुजित कोशिरे यांनी सांगितले की, डेंगीचा फैलाव रोखण्यासाठी घरासमोर व परिसरात पाणी साचू देणे टाळावे.

पाण्याच्या टाक्या, ड्रम, कुलर यांची झाकणं बंद ठेवावीत. आठवड्यातून एक दिवस कोरडा दिवस पाळावा. तसेच सकाळी व संध्याकाळी पूर्ण बाह्य कपडे वापरावेत. डासांपासून संरक्षणासाठी मच्छरदाणी, रिपेलंट्सचा वापर करावा.

या पार्श्वभूमीवर, उपजिल्हा रुग्णालय व आरोग्य विभागाकडून नागरिकांना आवाहन करण्यात आले आहे की, डेंगीवर नियंत्रण मिळवायचे असल्यास परिसराची स्वच्छता राखणे ही सामूहिक जबाबदारी आहे. शासन, संस्था आणि नागरिकांनी एकत्रित प्रयत्न केल्यास डेंगीवर निश्चितच नियंत्रण मिळवता येईल.