Pandharpur Wari 2025: पंढरीत चंद्रभागेतीरी भक्तिरसाला उधाण

Solapur News:

पंढरीची वारी आहे माझे घरी ।

आणिक न करी तीर्थव्रत ।।

व्रत एकादशी करीन उपवासी ।

गाईन अहर्निशी मुखी नाम ।

नाम विठोबाचे घेईन मी वाचे ।

बीज कण्यांतीचे तुका म्हणे ।।

अर्थात, पंढरपूर म्हणजे अवघ्या तीर्थांचे माहेर, पंढरपूरची वारी केली, की इतर कुठलीही तीर्थयात्रा करण्याची आवश्यकता नाही, असे भाव मनात ठेवत राज्याच्या कानाकोपऱ्यातून आज (ता.६) होणाऱ्या आषाढी यात्रेच्या सोहळ्यासाठी लाखोंच्या संख्येने वारकरी पंढरीत दाखल होत आहेत. या सोहळ्यात दशमीच्या स्नानाला विशेष महत्त्व असल्याने शनिवारी भल्या पहाटेपासूनच चंद्रभागा नदीच्या तीरावर स्नानासाठी वारकऱ्यांची एकच झुंबड उडाली. टाळ-मृदंगाचा गजर आणि हरिनामाच्या जयघोषाने अवघ्या पंढरीत भक्तीला उधाण आल्याचे चित्र आहे.

दरम्यान, आषाढी वारीचा मुख्य सोहळा आज साजरा होत असून, पहाटे अडीच वाजता मुख्यमंत्री देवेंद्र फडणवीस यांच्या हस्ते सपत्निक श्री विठ्ठल-रुक्मिणीची शासकीय महापूजा होणार आहे. महाराष्ट्राच्या कानाकोपऱ्यासह शेजारील तेलंगण, आंध्र प्रदेश आणि कर्नाटकमधूनही वारकरी पंढरीत दाखल होत आहेत.

शहरातील विविध मंदिरे, मठ, धर्मशाळा आणि वारकऱ्यांच्या राहुट्यांमध्ये कीर्तन, प्रवचन आणि भजनाचे सूर आळवले जात आहेत. विठ्ठल मंदिर परिसर, प्रदक्षिणामार्ग, ६५ एकर, चंद्रभागा वाळवंट, गोपाळपूर रस्त्यावरील पत्राशेड, भक्तिमार्ग, कैकाडी महाराज मठ, तनपुरे महाराज मठ, रेल्वे स्थानक परिसरात वारकऱ्यांची मोठी गर्दी आहे.

शहरातील मंदिर परिसर, प्रदक्षिणा मार्ग, स्टेशन रस्ता आदी प्रमुख मार्गांवर प्रासादिक, खेळणी साहित्य, तुळशीमाळा, मृदंग, तबला, वीणा आदी भजनी साहित्याची दुकाने, सौंदर्य प्रसाधने, कपडे, घरगुती साहित्याच्या विक्रीसाठी व्यापारपेठाही सजल्या आहेत.

यंदा पहिल्यांदाचा व्हीआयपी दर्शन पूर्णपणे बंद करण्यात आल्याने वारकऱ्यांच्या पदस्पर्श दर्शनाची रांग पुढे-पुढे सरकत आहे. एरवीही दर्शनासाठी १५ ते १७ तासांचा लागणारा वेळ आता ५ ते ७ तासांवर आल्याने वारकऱ्यांमध्ये समाधान व्यक्त होत आहे.

क्षणोक्षणी गर्दीत वाढ

सावळ्या विठुरायाच्या भेटीसाठी आळंदीहून निघालेल्या संतशिरोमणी ज्ञानेश्‍वर महाराज आणि देहूहून संतश्रेष्ठ तुकाराम महाराज यांच्यासह संत सोपानदेव, संत मुक्ताबाई, संत गजानन महाराज हे प्रमुख पालखी सोहळे शनिवारी पंढरीत दाखल झाले. त्याच बरोबर मोठ्या संख्येने वारकरी पंढरीत दाखले झाले. त्याशिवाय एस.टी., रेल्वे आणि खासगी वाहनांद्वारे वारकरी दाखल होत आहेत. त्यामुळे पंढरपुरातील गर्दी सातत्याने वाढतेच आहे. ज्ञानोबा-तुकारामाचा जयघोष आणि टाळ-मृदंगाच्या गजराने प्रदक्षिणा मार्गासह चंद्रभागा तीराकडे निघालेल्या दिंड्या आणि वारकऱ्यांमुळे चोहोबाजूंनी भक्तीचा प्रवाह पंढरीत एक होत आहे.

शेतकऱ्यांसाठी कृषी महोत्सवाची मेजवानी

दर वर्षीप्रमाणे पंढरपूर कृषी उत्पन्न बाजार समितीच्या वतीने कृषी प्रदर्शन भरविण्यात येते, यंदाही खास राज्यस्तरीय कृषी महोत्सव हे कृषी बाजार समिती आवारात भरवण्यात आले आहे. विठुरायाच्या दर्शनाबरोबर वारकरी-शेतकऱ्यांना त्याचीही मेजवानी वारीत मिळणार आहे. वारी कालावधीत तीन दिवस हे प्रदर्शन चालणार आहे.