Fruit Market : मालेगावच्या फळ बाजाराला झळाळी

Nashik News : येथील बाजार समितीत विविध फळांची आवक वाढली आहे. आवक वाढल्याने फळ बाजाराला झळाळी आली आहे. शहर व परिसरात शेकडो हातगाड्यांवर आंब्यासह इतर फळे विकले जात आहेत. टरबूज व खरबूजाची आवक कमी झाली असून सध्या फळांचा राजा आघाडीवर आहे. फळांची आवक वाढल्याने समितीच्या उत्पन्नात वाढ झाली आहे. शिवाय फळ विक्रीतून मोठ्या प्रमाणावर आर्थिक उलाढाल होत आहे.

येथील बाजार समितीच्या फळफळावळ विभागात दररोज शेकडो क्विंटल फळे विक्रीसाठी येत आहेत. घाऊक व्यापारी बांधावर जाऊन शेतकऱ्यांकडून उच्च प्रतीचा डाळिंब खरेदी करत आहेत. मात्र, मध्यम व सर्वसाधारण प्रतीचा डाळिंब येथील बाजारात विक्रीसाठी येत आहे. सध्या सर्वसाधारण डाळिंबच्या एका कॅरेटला १५०० ते २२०० रुपयापर्यंत भाव आहे.

चिक्कूची देखील चांगली आवक आहे. चिकूसाठी ३५० ते ४५० रुपये प्रति कॅरेटचा भाव आहे. पेरू २५० ते ५५० रुपये प्रतिकॅरेट विकला जात आहे. खरबूज १० ते १८ रुपये प्रतिकिलो प्रमाणे विक्री होत आहे. मोसंबीच्या प्रति कॅरेटसाठी ४३० ते ६०० रुपयापर्यंत भाव आहे. सफरचंद (सिमला) प्रति पेटीचा दर ८५० ते १९०० रुपया दरम्यान आहे. बाजारात रोज दहा ते बारा टन टरबूज विक्रीसाठी येत आहे. टरबूजचा भाव २ ते ५ रुपये किलो दरम्यान आहे.

द्राक्षांची आवक देखील कमी होवू लागली आहे. सध्या येथील बाजारात दररोज ८ ते १० क्विंटल द्राक्ष विक्रीसाठी येत आहेत. प्रति कॅरेटचा भाव ३५० ते ५५८ रुपया दरम्यान आहे. चिंच मोठ्या प्रमाणावर येत असून रोज ११० ते १२० क्विंटल आवक आहे. भाव ४९ ते ८० रुपये प्रतिकिलो आहे.

भाजीपाल्याची आवक कमी

येथील बाजारात गेल्या चार दिवसापासून आंब्यांची रेलचेल आहे. लालबाग, बदाम, केशर व हापूस या प्रजातीचे आंबे विक्रीसाठी येत आहेत. आंब्यांचे दर ७० ते १४० प्रतिकिलो दरम्यान आहे. किरकोळ बाजारात ८० ते २५० रुपये किलोदरम्यान आंबे विकले जात आहेत. आंबे व इतर फळ विक्रीतून मोठी उलाढाल होत आहे. सध्या भाजीपाल्याची आवक कमी झाली आहे. भाजीपाला विक्री करणारे हातगाडीवरील व्यावसायिक आंबे व इतर फळांकडे वळले आहेत.