Maharashtra Budget 2025: तीन घोषणांमुळे विदर्भाच्या शेती क्षेत्राला मिळेल बूस्ट

Nagpur News: गडचिरोलीत रेशीम कोष बाजार, देवलापारला देशी गोवंश संशोधन केंद्र त्यासोबतच ॲग्रो लॉजीस्टीक हब अशा घोषणा सोमवारी (ता. १०) सादर झालेल्या अर्थसंकल्पी अभिभाषणात अर्थमंत्री अजित पवार यांनी केल्या. यामुळे विदर्भातील कृषी क्षेत्राला बूस्ट मिळेल, अशी शक्‍यता वर्तविली जात आहे. देवलापार येथील गोवंश संशोधन केंद्रातून येत्या दहा वर्षांत रसायनमुक्‍त शेतीचा पर्याय उपलब्ध करुन दिला जाणार आहे.

राज्याच्या इतर भागात पारंपरिक पद्धतीने तुती लागवड करुन रेशीम कोश उत्पादन केले जाते. याउलट पूर्व विदर्भातील चंद्रपूर, भंडारा, गडचिरोली, गोंदिया या चार जिल्ह्यांत रेशीम शेतीला मर्यादा आहेत. वनक्षेत्र अधिक असल्याने या भागात ऐन आणि अर्जुन या झाडावर रेशीम अळ्यांचे संगोपन केले जाते.

त्याकरिता १८ हजार ८६० हेक्‍टर जमीन क्षेत्रात ऐन आणि अर्जुनाची वृक्ष लागवड वनविभागाच्या माध्यमातून केली आहे. प्रति शेतकरी दोन हेक्‍टर जमीन दिली जाते. त्या माध्यमातून टसर रेशीमचे उत्पादन होते. चार जिल्ह्यांत मिळून दहा टन इतके टसर रेशीम उत्पादन होत असल्याची माहिती रेशीम उपसंचालक महेंद्र ढवळे यांनी दिली.

परंतु रेशीम कोश बाजार नसल्याच्या परिणामी खासगी व्यापाऱ्यांना हा कोष विकावा लागतो. त्यांच्याकडून अपेक्षित दर मिळत नाही आणि या व्यवहारात आदिवासी टसर रेशीम उत्पादकांचे आर्थिक शोषण होते. टसर रेशीम उत्पादनासाठी यावर्षी १६ हजार रुपये खंडी (चार रुपये प्रति कोष) असा दर मिळाला. आरमोरी (गडचिरोली) येथे रेशीम कोष बाजार प्रस्तावित आहे. त्याचा फायदा टसर रेशीम उत्पादकांना होणार आहे.

ॲग्री लॉजीस्टीक हब

विदर्भात ॲग्री लॉजीस्टीक हब उभारणीची घोषणा करण्यात आली. वर्धा येथे ड्रायपोर्ट प्रस्तावित आहे. त्यामुळे निर्यातीला चालना मिळणार आहे. त्यासोबतच लॉजीस्टीक हबच्या माध्यमातून देखील निर्यातीला बूस्ट मिळेल, असा विश्‍वास व्यक्‍त केला जात आहे.