Hinganghat Market Committee : हिंगणघाट बाजार समिती उभारणार कोल्ड स्टोअरेज

ॲग्रोवन वृत्तसेवा

Wardha News : वर्धा ः शेतकऱ्यांच्या उत्कर्षासाठी सातत्याने पुढाकार घेणाऱ्या हिंगणघाट बाजार समिती प्रशासनाकडून आता शीतगृह (कोल्डस्टोरेज) उभारणीचा निर्णय घेण्यात आला आहे. याकरिता तब्बल १५ कोटी रुपयांची तरतूद करण्यात आली असून येत्या वर्षभरात हा प्रकल्प पूर्णत्वास जाईल अशी माहिती बाजार समिती सभापती ॲड. सुधीर कोठारी यांनी दिली.

विदर्भात नाशवंत संत्रा फळासोबतच सोयाबीन, हरभरा, सोया ढेप, भाजीपाला यांसारख्या शेतीमाल व प्रक्रियाजन्य पदार्थांचे उत्पादन होते. हा सारा शेतमाल कोल्डस्टोरेजमध्ये ठेवल्यास त्यात आर्द्रता असल्यामुळे शेतीमालाचे वजन स्थिर राहते सोबतच दर्जा टिकून राहत असल्याने मागणी असलेल्या काळात याचा पुरवठा झाल्यास चांगला दरही मिळतो. त्यामुळे नजीकच्या काळात शेतीमालाच्या शीतगृहातील साठवणुकीवर भर दिला जात असल्याची माहिती ॲड. सुधीर कोठारी यांनी दिली.

५७०० टन इतकी या कोल्डस्टोरेजची क्षमता असून त्याकरिता १५ कोटी रुपयांचा खर्च अपेक्षीत आहे. आमदार समीर कुणावार यांच्या उपस्थितीत नुकतेच या प्रकल्पाचे भूमिपूजन करण्यात आले. त्यानंतर आता कामाला देखील सुरुवात झाली असून येत्या वर्षभरात हे काम तडीस जाणार आहे. बाजार समितीच्या स्तरावर शितगृहाची सोय उपलब्ध करणारी हिंगणघाट बाजार समिती हे विदर्भातील एकमेव ठरणार आहे.

शेतकऱ्यांसाठी सवलतीचा दर

शीतगृहात शेतमाल ठेवण्यासाठी व्यापारी आणि शेतकऱ्यांसाठी वेगवेगळा दर राहणार आहे. व्यापाऱ्यांना कोणतीच सवलत मिळणार नसली तरी शेतकऱ्यांसाठी निश्‍चीत शुल्काच्या केवळ ५० टक्‍के इतकीच आकारणी होईल, असे ॲड. कोठारी सांगतात. शेतकऱ्यांना देखील शीतगृहात शेतमाल साठवणूकीमुळे होणारे लाभ मिळावे, याकरिता सवलतीच्या दरात शीतगृह उपलब्धतेवर भर दिला गेला आहे.

बाजार समितीने शेतकरी हिताच्या उपक्रमांवर सातत्याने भर दिला आहे. आता शितगृहासोबतच येत्या काळात कृषी चिकित्सालय सुरु करण्याचे प्रस्तावीत आहे. या माध्यमातून माती, पाणी परिक्षणासह पिकावरील किडरोग नेमकी कोणती हे शेतकऱ्यांना जाणता येणार आहे. त्या दृष्टीने बाजार समिती प्रयत्नशील आहे.

- ॲड. सुधीर कोठारी, सभापती, बाजार समिती हिंगणघाट