Malegaon Coopertative Election: ‘माळेगाव’ निवडणुकीमध्ये अजित पवारांचे पॅनेल आघाडीवर

Pune News: माळेगाव सहकारी साखर कारखान्याच्या निवडणुकीत मतमोजणीच्या पहिल्या टप्प्यात सायंकाळी पाच वाजेपर्यंत उपमुख्यमंत्री अजित पवार यांच्या नेतृत्वाखाली नीलकंठेश्‍वर पॅनेलचे उमेदवार आघाडीवर होते.

स्वतः अजित पवार ‘ब’ प्रवर्गातून १०१ पैकी ९१ मध्ये मिळवून विजयी झाले. त्यांच्या पॅनेलमधील अजित पवार यांच्यासह भटक्या जाती विमुक्त जाती प्रवर्गातील विलास ऋषिकांत देवकाते, अनुसूचित जाती जमाती प्रवर्गातील रतनकुमार भोसले, महिला प्रवर्गातील उमेदवार संगीता बाळासाहेब कोकरे, माळेगाव प्रवर्गातून माजी अध्यक्ष बाळासाहेब तावरे हे आघाडीवर होते.

सायंकाळी पाच वाजेपर्यंत महिला प्रवर्गातील चंद्रराव तावरे गटाच्या राजश्री कोकरे व अजित पवार गटाच्या संगीता कोकरे या दोन महिला उमेदवार आघाडीवर होत्या. अजित पवार गटाच्या ज्योती मुलमुले या काही मतांनी पिछाडीवर होत्या.

दरम्यान, सकाळी नऊ वाजता बारामतीतील प्रशासकीय भवन येथे मतमोजणीस प्रारंभ झाला. मतमोजणीस उपस्थित सर्वच उमेदवार व त्यांच्या प्रतिनिधींच्या चेहऱ्यावर तणाव स्पष्टपणे दिसत होता. ओबीसी, एससी व महिला प्रवर्गाच्या मतमोजणीनंतर अजित पवार यांच्या गोटात काहीसे उत्साहाचे वातावरण होते. मतमोजणी शांततेत सुरू होती. पोलिसांनी कडेकोट बंदोबस्त ठेवल्यामुळे मतमोजणी केंद्रापर्यंत फक्त प्रतिनिधी उमेदवार व संबंधित कर्मचाऱ्यांना येणे शक्य होत होते.

दरम्यान, माळेगाव गटामध्ये माजी अध्यक्ष रंजन तावरे व बाळासाहेब तावरे हे दोन्ही परस्पर विरोधी पॅनेलचे उमेदवार आघाडीवर होते. अनेक ठिकाणी परस्पर विरोधी मतदान झाल्याची चर्चा होती. ती प्रत्यक्षात उतरताना मतमोजणीमध्ये दिसत होती. दोन्ही बाजूंच्या पॅनेल प्रमुखांनी वेळोवेळी पॅनेल टू पॅनेल मतदान करण्याचे आवाहन केले होते. प्रत्यक्षात मात्र आपल्या पसंतीचे उमेदवार सभासदांनी निवडण्याचा प्रयत्न केल्याचे मतमोजणीनंतर दिसून आले.