Animal and bird exhibition : सिंधुदुर्गात ६ मेपासून कृषी, पशुपक्षी प्रदर्शन

Sindhudurg News : सिंधुदुर्ग जिल्हा परिषदेमार्फत शासकीय योजनांचा जत्रा आणि कृषी, पशु-पक्षी प्रदर्शन येत्या ६ ते ९ मे या कालावधीत कुडाळ येथील नवीन बसस्थानकासमोरील मैदानात भरविण्यात येणार आहे. या प्रदर्शनात १०० हून अधिक स्टॉल्स असणार असून या प्रदर्शन कालावधीत विविध शासकीय योजनांच्या ७५ हजार लाभार्थ्याना निवडीचे पत्र दिले जाणार आहे.

जिल्हा परिषदेच्या माध्यमातून दरवर्षी कृषी प्रदर्शन भरविले जाते. या वर्षीचे कृषी आणि पशुपक्षी प्रदर्शन कुडाळ येथील नवीन बसस्थानकासमोरील मैदानात होणार आहे. चार दिवस हे प्रदर्शन सुरू राहणार असून प्रदर्शनासाठी सुमारे ४८ लाख रुपये खर्च येणार आहे.

अमृतमहोत्सवी वर्षाच्या निमित्ताने या प्रदर्शनात विविध उपक्रम राबविले जाणार आहेत. शासनाच्या महसूल, पंचायत समिती, जिल्हा परिषद, कृषी विभाग याशिवाय विविध विभागांकडून राबविल्या जाणाऱ्या योजनांअंतर्गत निवड झालेल्या ७५ हजार लाभार्थ्यांना निवडीचे पत्र या वेळी देण्यात येणार आहे. या प्रदर्शनात १०० स्टॉल्स असणार आहेत. यात बचत गटांच्या उत्पादनांचत्या स्टॉल्सचा समावेश आहे.