Agriculture Harvesting: खानदेशात शेतीची धावपळ : गहू, हरभरा, कांदा काढणीला वेग

Jalgaon News: खानदेशात हरभरा, गहू कापणी व काढणीस वेग आला आहे. रोज ढगाळ वातावरण राहत असल्याने शेतकऱ्यांमध्ये पावसाची भीती आहे. यामुळे कापणी, मळणीचे काम गतीने सुरू आहे.

मजूरटंचाईत गहू काढणीत मोठ्या हार्वेस्टरची मदत होत आहे. एकरी १६०० ते १७०० रुपये गहू मळणीसाठी मोठे हार्वेस्टरचालक घेत आहेत. दादर ज्वारी, हरभरा कापणी व मळणीचे कामही सुरू आहे. यासाठी मजुरांची अधिकची गरज आहे. हरभरा, ज्वारी कापणी, कणसे गोळा करण्यासंबंधी एकरी चार हजार रुपये मजुरी घेतली जात आहे.

मजूरटंचाई असल्याने शेतकऱ्यांना सात ते आठ दिवसांची प्रतीक्षा काम करून घेण्यासाठी करावी लागत आहे. यामुळे शेतकरी त्रस्त असून, अधिकचा उत्पादन खर्च लागत आहे. दोन दिवसांपासून ढगाळ वातावरण आहे. यात पावसाची भीती आहे. यामुळे शेतकरी कामे करून घेण्यासंबंधी धावपळ करीत असून, मजुरांअभावी दमछाक होताना दिसत आहे. कांद्याची लागवड खानदेशात अधिक आहे.

त्यात दरात घसरण झाली आहे. पुढे काढणी पूर्ण होऊन आवकही वाढेल. यामुळे शेतकरी लवकरात लवकर काढणी करून त्याची विक्री करण्यावर भर देत आहेत. कांद्याची १५ ते २० टक्के काढणी खानदेशात झाली आहे. काढणीचे काम या महिन्याच्या अखेरपर्यंत गती घेणार आहे. कारण कांद्याची लागवड डिसेंबर ते जानेवारी या महिन्यात विविध टप्प्यांत झाली होती.

जानेवारीच्या मध्यात लागवडीच्या कांद्यात पक्वता नाही. पक्वता येत असून, ही प्रक्रिया आणखी १० ते १२ दिवस सुरू राहील. केळी, पपई काढणीचीही धावपळ मागील आठवड्यापासून पपई, केळी काढणीसही वेग आला आहे. ढगाळ वातावरण सध्या आहे. पुढे पाऊस आल्यास रस्ते खराब होतात.

रस्ते वाळून व्यवस्थित होण्यास सात ते आठ दिवस लागतात. यामुळे शेतकरी पपई व केळीची काढणी करून घेत आहेत. पिके काढणी, कापणी व मळणीवर आहेत. अशात उष्णता वाढत असल्याने शेतकऱ्यांच्या अडचणीदेखील वाढल्या आहेत.