Farmer Agitation : दूधदरासाठी आजपासून शेतकरी संघटनेचे आंदोलन

Nagar News : दुष्काळी परिस्थितीवर मात करत दूध व्यवसाय जोपासला, पण सरकारी पातळीवर दुधाला खर्चाच्या तुलनेत दर मिळत नसल्याने दूध उत्पादक पुन्हा आक्रमक होऊ लागले आहेत.

श्रीरामपूर तालुक्यात २४ जूनला शेतकरी संघटनेने आंदोलन पुरकारले असून नेवासा, पारनेर व अन्य भागांतील शेतकरीही प्रशासनाला निवेदने देऊन आंदोलनाचा इशारा देत आहेत. नगर जिल्ह्यातून सुरुवात करत दूधदरासाठीचे आंदोलन राज्यव्यापी करण्याचा शेतकरी, दूध उत्पादक शेतकरी समन्वय समिती प्रयत्न करत आहे.

राज्यातील साधारण पाच लाखांपेक्षा अधिक शेतकरी कुटुंबे दुग्ध व्यवसाय करतात. त्यातील साठ ते सत्तर टक्के कुटुंबांकडे दुभत्या गाई आहेत. राज्यात दररोज साधारण दोन ते सव्वादोन कोटी लिटर गाईच्या दुधाचे संकलन होते.

सरकारी पातळीवर दुधाची खरेदी करणारा महानंद संघ बंद पडल्यात जमा आहे. त्यामुळे या सर्व दुधाची खरेदी खासगी दूध संघ करतात. दुग्धजन्य पदार्थांना मागणी नसल्याचे कारण पुढे करत नेहमीच दुधाचे दर पाडले जात असल्याचा आरोप सातत्याने होत आहे. या वर्षी तर राज्यातील बहुतांश जिल्ह्यांत दुष्काळी परिस्थिती असल्याने चारा, पिण्याच्या पाण्याची टंचाई होती.