Hurricane : आग्नेय आशियानंतर भारतावर ‘यागी’चे ढग

New Delhi : तब्बल ३८०० किलोमीटर अंतरावर प्रशांत महासागरात निर्माण झालेल्या चक्रीवादळाचा परिणाम भारताच्या हवामानावर होत आहे. अर्थात, यागीचा परिणाम बंगाल, झारखंड, बिहार आणि पूर्व उत्तर प्रदेशसाठी फायदेशीर ठरला आहे. या भागातील पावसाची उणीव या वादळामुळे भरून निघाली आहे. यागी चक्रीवादळ पश्‍चिमेकडे म्हणजेच भारताकडे वळत आहे.

दरम्यान, संयुक्त राष्ट्राने यागी चक्रीवादळाचा फटका बसलेल्या व्हिएतनामला सुमारे दोन दशलक्ष डॉलरची मदत जाहीर केली आहे. व्हिएतनामध्ये सुमारे २९० जण मृत्युमुखी पडले. याशिवाय अडीच लाख घरांची हानी झाली असून, तीस लाख लोकांना त्याचा फटका बसला आहे.

प्रशांत महासागरात निर्माण झालेले वादळ सुरुवातीला चीनच्या दक्षिण किनारपट्टीवर धडकले आणि त्याचा बदल विनाशकारी चक्रीवादळात झाला. त्याचा वेग ३५० किलोमीटर प्रतितास होता. या चक्रीवादळाने फिलिपिन्स, व्हिएतनाम, थायलंड, म्यानमार, लाओसला धडक दिली. काही दिवसांपूर्वी यागी वादळाचे चक्रीवादळात रूपांतर झाले असून, आता ३८०० किलोमीटरचा प्रवास पूर्ण करून भारतात प्रवेश करत आहे.

या चक्रीवादळाचा परिणाम दिल्ली-एनसीआर, हरियाना, चंडीगड, उत्तर प्रदेश आणि उत्तराखंडमध्ये पाऊस पडत आहे. मात्र यागी चक्रीवादळाचा परिणाम लवकरच संपेल, असे हवामान खात्याने म्हटले आहे. पण परतीचा पाऊस शेतीसाठी उपयुक्त ठरत आहे. यागी चक्रीवादळामुळे भारतातील हवामान बदलण्याचे संकेत मिळत आहेत. त्यामुळे पश्‍चिम आणि पूर्व राजस्थानात पाऊस पडू शकतो. २७ सप्टेंबरनंतर सरासरीपेक्षा अधिक पाऊस होण्याची शक्यता आहे.