Latur News : अडत व्यापाऱ्यांकडून खरेदी केलेल्या शेतीमालाचे पेमेंट खरेदीदारांनी चोवीस तासांत द्यावे, या मागणीसाठी मागील पंधरा दिवसांपासून उच्चतम कृषी उत्पन्न बाजार समितीचा अडत बाजार बंद आहे.
व्यापारी व खरेदीदारांमध्ये समन्वय घडवून बाजार सुरू करण्याचे समितीचे व प्रशासनाचे प्रयत्न अयशस्वी ठरल्यानंतर आता व्यापारी व हमाल मापाड्यांनी आंदोलन हाती घेतले आहे. सोमवारी (ता. १५) व्यापाऱ्यांनी घोषणाबाजी तर हमाल मापाड्यांनी हलगी आंदोलन केल्यानंतर मंगळवारी (ता. १६) व्यापाऱ्यांनी ठिय्या आंदोलन तर हमाल मापाड्यांनी अर्धनग्न आंदोलन केले.
या स्थितीत सलग १६ व्या दिवशीही बाजारात शेतीमालाचा सौदा निघाला नाही. यामुळे बाजार समितीशी सर्व घटकांची गोची झाली असून, हाताला काम नसल्याने हमाल मापाडी व गाडीवानांवर उपासमारीची वेळ आली आहे. पेमेंटच्या विषयावरून पंधरा दिवसांपासून अडत बाजारातील कोट्यवधीची उलाढाल ठप्प झाली आहे. यात व्यापारी व खरेदीदारांच्या बैठकांचे सत्र झाले. मात्र तोडगा निघाला नाही.
परंपरेनुसार दहा दिवसांत पेमेंट देण्याच्या भूमिकेवर खरेदीदार ठाम असून बाजार समितीच्या परिपत्रकानुसार चोवीस तासांत पेमेंट देण्याच्या मागणीबाबत व्यापारी मागे हटायला तयार नाहीत. पंधरा दिवसांत व्यापारी व खरेदीदारांमध्ये समन्वय घडवून आणण्याचे प्रयत्न बाजार समिती व प्रशासनाने केले. मात्र त्याला यश आले नाही. शेवटी बाजार समितीने व्यापाऱ्यांना नोटिसा देऊन बाजार सुरू करण्यास सांगितले. त्यालाही व्यापारी व खरेदीदारांनी ठेंगा दाखवला.
यात समितीने व्यापाऱ्यांनाच खरेदीदादाराचे परवाने देण्याची तयारी दाखवून बाजार सुरू करण्याचे प्रयत्न केले. त्यामुळे पुन्हा जास्त गुंता वाढण्याची शक्यता असल्याने पुढे काहीच झाले नाही. बाजारातील व्यवहारात पेमेंटचा विषय हा व्यापारी व खरेदीदारांतील परस्पर सहमतीचा विषय आहे. तरीही व्यापाऱ्यांनी कायद्याचा आधार घेऊन चोवीस तासांत पेमेंटची मागणी लावून धरली तर कायद्यानुसार बाजारात शेतकऱ्यांसोबत किती व्यवहार करतात, असा विरोधी सूरही खरेदीदारांनी लावून धरला.
हा गोंधळ सुरू असतानाच आता व्यापारी व हमाल मापाड्यांनी आंदोलनाचे हत्यार उपसले आहे. यात व्यापाऱ्यांनी बाजार समितीसमोर येऊन घोषणाबाजी केली तर हमाल मापाड्यांनी हलगी वाजून आंदोलन केले. मंगळवारी आंदोलनाचा दुसरा भाग झाला. यात व्यापाऱ्यांनी समितीसमोर ठिय्या आंदोलन तर हमाल मापाड्यांनी अर्धनग्न आंदोलन करून बाजार सुरू करण्याची मागणी केली. या गोंधळात मंगळवारीही सौदा निघाला नाही. दरम्यान सोमवारी भाजयुमोचे प्रदेश उपाध्यक्ष अजित पाटील कव्हेकर यांनी समितीचे सभापती जगदीश बावणे यांची भेट घेऊन ४८ तासांत बाजार सुरू न केल्यास आंदोलनाचा इशारा दिला.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.