Agriculture Scheme : चार हजार कोटींच्या मदतीमुळे रब्बी निविष्ठा खरेदीला आधार

Pune News : राज्यातील शेतकऱ्यांसाठी ‘पीएम किसान’ व ‘नमो’ योजनेचे मिळून एकूण ४००० कोटी रुपये उपलब्ध होत आहेत. त्याचा वापर शेतकऱ्यांना रब्बी हंगामाच्या निविष्ठांची खरेदी करण्याकरिता होऊ शकतो, असे कृषी विभागाचे म्हणणे आहे.

पंतप्रधान आज (ता.५) वाशीम येथे येत आहेत. त्यांच्या हस्ते ‘प्रधानमंत्री किसान सन्मान निधी योजना’ तसेच ‘नमो शेतकरी महासन्मान निधी योजने’तील मदतीच्या हप्त्याचे ऑनलाइन वाटप होत आहे. ‘पीएम किसान’ योजना २०१९ मध्ये सुरू झाली. त्यातून प्रतिहप्ता दोन हजार रुपये याप्रमाणे तीन समान हप्त्यात सहा हजार रुपये प्रति वर्षी शेतकऱ्यांच्या आधार संलग्न बँक खात्यात जमा होतात. यामुळे राज्यातील १.२० कोटी शेतकऱ्यांना आतापर्यंतच्या १७ हप्त्यांमधून ३२०० कोटी रुपये मिळालेले आहेत.

‘पीएम किसान’ला समांतर ठरणारी ‘नमो’ योजना राज्यातील युती सरकारने आणली आहे. ‘पीएम किसान’च्या चौदावा हप्त्यापासून पुढील प्रत्येक हप्ता वितरणावेळी ‘नमो’चाही लाभ देण्यात येत आहे. राज्य शासनाने २०२३-२४ ते २०२४-२५ या आर्थिक वर्षात एकूण चार हप्त्यांमध्ये एकूण ९१.४५ लाख शेतकरी कुटुंबांना लाभ दिला आहे. आतापर्यंत सहा हजार ९४९ कोटी रुपये ‘नमो’तून वाटले गेले आहेत.

कृषी आयुक्तालयाच्या म्हणण्यानुसार, ‘पीएम किसान’चा १८ हप्ता देताना केंद्राने काही निकष लावलेले आहेत. त्यानुसार भूमी अभिलेखाच्या अद्ययावत नोंद असलेले, बॅंक खाते आधार क्रमांकाशी संलग्न असलेले व ई-केवायसी बंधनकारक आहे. तीनही अटी पूर्ण केलेल्या शेतकऱ्यांच्याच बॅंक खात्यात अठरावा हप्ता जमा होईल. राज्यात सध्या असे ९१.५२ लाख शेतकरी आहेत. त्यांच्या खात्यात किमान १८०० कोटी रुपये जमा होतील.

‘पीएम किसान’चा निधी देतानाच ‘नमो’चा पाचवा हप्तादेखील मिळणार आहे. त्यामुळे एकूण चार हजार रुपयांची रक्कम शेतकऱ्यांच्या बॅंक खात्यात जमा होईल. एकत्रित रक्कम मिळणाऱ्या शेतकऱ्यांची संख्या ९० लाखांच्या पुढे आहे.