Leopard Wildlife Sanctuary: अहिल्यानगरला बिबट्यांसाठी उभारणार संरक्षित क्षेत्र

Ahilyanagar News: अहिल्यानगर जिल्ह्यात सध्या सर्वच भागात बिबट्याचा धुमाकुळ सुरू आहे. माणसांवर, पाळीव प्राण्यांवर हल्ले होत असल्याने शेतकरी, नागरिक त्रस्त आहे. या त्रासातून सुटका होण्यासाठी शासनाच्या ५०० एकर जमिनीवर तटबंदी करून बिबट्यांसाठी संरक्षित क्षेत्र उभे करण्याच्या मागणीला केंद्रीय वनमंत्र्यांनी सकारात्मक प्रतिसाद दिला आहे.

असे संरक्षित क्षेत्र उभारून मानवी वस्त्यांमध्ये आढळणारे बिबटे त्या क्षेत्रात सोडण्याबाबत कार्यवाही होईल, असे केंद्रीय वनमंत्री भुपेंद्र यादव यांनी अश्वासन दिले आहे. अहिल्यानगर जिल्ह्यातील राहाता, राहुरी, कोपरगाव, संगमनेर, अकोले, पारनेर, श्रीगोंदा भागात बिबट्याची संख्या अधिक आहे. अहिल्यानगर, जामखेड, पाथर्डी, कर्जत तालुक्यांतही बिबटे आता आढळून येत आहेत. माणसांसह वन्यप्राणी आणि पाळीव प्राण्यांवर होणारे हल्ले वाढत आहेत. त्यामुळे शेतीकामात अडथळे येत असल्याने शेतकरी, नागरिक त्रस्त झाले आहेत.

त्यामुळे अहिल्यानगर दक्षिणचे खासदार नीलेश लंके यांनी अहिल्यानगर जिल्ह्यातील बिबट्यांची वाढती संख्या व माणसांवर होणारे वारंवार हल्ले यावर उपाययोजना करण्याची मागणी केंद्रीय वन मंत्री भुपेंद्र यादव यांच्याकडे केली. त्या संदर्भातचे निवेदन केंद्रीय मंत्री यादव यांना देण्यात आले. या निवेदनात असे म्हटले आहे, की सह्याद्री पर्वत रांगेत तसेच महाराष्ट्राच्या अन्य पठारी व पर्वतीय भागांत बिबट्यांची संख्या झपाट्याने वाढत असून ते नरभक्षक होत आहेत.

त्यातून वन्यजीव व मनुष्यामध्ये संघर्ष होत आहे. वन्य प्राण्यांकडून शेतामध्ये काम करणारे शेतकरी तसेच जंगल क्षेत्रात राहणारे आदिवासी यांच्यावरील हल्ल्यांच्या घटनांमध्ये मोठी वाढ होताना दिसत आहे. अहिल्यानगर लोकसभा मतदारसंघात ऊस शेतीचे क्षेत्र अधिक आहे. ऊस क्षेत्र बिबट्यांना लपण्यासाठी तसेच प्रजननासाठी सुरक्षित आहे.

त्यातून बिबट्यांची संख्या झपाट्याने वाढत आहे. त्यासाठी बिबट्यांची नसबंदी करण्यासंदर्भातील योजना राबवावी. त्या माध्यमातून बिबट्यांची संख्या नियंत्रित ठेवण्यास मदत होऊन मानव व वन्यजीवांमधील संघर्ष कमी होऊ शकेल. तसेच जीवन आणि मालमत्तेचे नुकसान होणार नाही, असे निवेदनात म्हटले आहे.