Koyna Dam : पावसाळ्यात कोयनेतून ९३३ दशलक्ष किलोवॉट वीजनिर्मिती

Satara News : कोयना धरणातून या वर्षी पावसाळ्यात १८ टीएमसी पाणी वीज निर्मितीसाठी वापरले. त्यातून ९३३ दशलक्ष किलोवॉट इतकी वीजनिर्मिती झाली. ती गेल्या वर्षीच्या तुलनेत कमी आहे. गेल्या वर्षी दुष्काळाचे सावट होते. परिणामी विजेची मागणी पावसाळ्यात देखील अधिक होती. त्‍यामुळे जून ते ऑक्टोबर या कालावधीत अधिक वीजनिर्मिती करावी लागली होती.

कोयना धरणाच्या पाणलोट क्षेत्रात या वर्षी प्रचंड पाऊस झाला. कोयना धरण क्षेत्रात ५७८७ मिलिमीटर, नवजाला ६८६२ मिलिमीटर, तर महाबळेश्वरला ६६४७ मिलिमीटर पावसाची नोंद झाली. या वर्षी पावसाळ्याच्या सुरुवातीला धरणातील पाणीसाठा अत्यंत कमी होता. पाणी पातळीही खालावली होती. १७.८७ टीएमसी साठा असताना पावसाला सुरुवात झाली.

धरण शंभर टक्के भरले. धरणातील एकूण पाण्याची आवक १७७.८४ टीएमसी इतकी झाली. पैकी सुमारे ५९ टीएमसी इतके पाणी दरवाजातून सोडले. हे संपूर्ण पाणी हे विनावापर खाली सोडले. त्याचवेळी विजेच्या मागणीच्या आधारावर सुमारे १८ टीएमसी इतके पाणी वीज निर्मितीसाठी वापरले.

त्यात पोफळीतून ३४५.९१०, स्टेज चारमधून ३४४.५००, केडीपीएचमधून ४८.८३०, अलोरे दरवाजातून १९३.९९२ दशलक्ष किलोवॉट इतकी वीजनिर्मिती करण्यात आली. परिणामी, यंदा पावसाळ्यात मागणीपेक्षा अधिक वीजनिर्मिती शक्य झाली.

गेल्या वर्षी वीजनिर्मिती अधिक

गेल्या वर्षी राज्यातील अनेक भागांत दुष्काळी परिस्थिती होती. कृष्णा नदीच्या पाणलोट क्षेत्रातही दुष्काळ जाहीर केला होता. टेंभू, ताकारी, म्हैसाळ उपसा सिंचन योजना सलग चालवण्याची वेळ आली होती. कोयनेतून त्यासाठी अतिरिक्त वीजनिर्मिती करावी लागली. गेल्या वर्षी पावसाळ्याच्या सुरुवातीला धरणातील पाणीसाठा १७.६४ टीएमसी इतकाच होता.

तर गेल्या वर्षी धरणातील एकूण पाणीसाठा ९१ टीएमसीपर्यंतच राहिला. एकूण पाण्याची आवक यंदाच्या तुलनेत तब्बल ७० टीएमसी कमी होती; म्हणजेच केवळ १०७ टीएमसी पाणी धरणात आले होते. दरवाजातून विनावापर विसर्गाची वेळच आली नव्हती. त्यावेळी अधिकाधिक पाण्याचा वापर व्हावा, शेती आणि वीजनिर्मितीला ते उपयोगात यावे, असे नियोजन करावे लागले होते. पाण्याचा विजेसाठी २५.८५ टीएमसी वापर झाला होता. तर सिंचनासाठी ५.७३ टीएमसी पाणी सोडले होते.