Water Storage : नांदेडमधील प्रकल्पांत ८४ टक्के पाणीसाठा

Nanded News : जिल्ह्यात पावसाळ्यात झालेल्या जोरदार पावसामुळे नांदेड पाटबंधारे विभागातील एकूण १०४ प्रकल्पांत ६१५.७० दशलक्ष घनमीटरनुसार ८४.५६ टक्के पाणीसाठा शिल्लक आहे. हा पाणीसाठा मागीलवर्षापेक्षा अधिक आहे.

जिल्ह्यातील मानार, विष्णुपुरी या प्रकल्पांबरोबरच जिल्ह्याशेजारील सिद्धेश्‍वर, येलदरी, इसापूर या मोठ्या प्रकल्पांतही चांगला पाणीसाठा शिल्लक. यामुळे रब्बी हंगामात पेरणीचे क्षेत्र वाढण्याची शक्यता बळावली आहे.

नांदेड जिल्ह्यात यंदा जूनमध्ये समाधानकारक पावसाअभावी धरणसाठ्यात घट झाली होती. ८० प्रकल्प असलेल्या लघू प्रकल्पांत तसेच नऊ प्रकल्प असलेल्या मध्यम प्रकल्पांतील पाणीसाठा तळाला गेला होता. परंतु यानंतर झालेल्या दमदार पावसामुळे प्रकल्पात पाणीसाठा वाढायला सुरुवात झाली. ऑगस्ट व सप्टेंबरच्या पहिल्या आठवड्यात झालेल्या अतिवृष्टीमुळे पाणीसाठा झपाट्याने वाढला.

सध्या जिल्ह्यातील १०४ प्रकल्पांत ६१५.७० दशलक्ष घनमीटरनुसार ८४.५६ टक्के शिल्लक आहे. सध्या जिल्ह्यात मोठा प्रकल्प असलेल्या विष्णुपुरी प्रकल्पात ७८.४६ दलघमीनुसार ९७.१२ टक्के पाणीसाठा झाला आहे. तर दुसरा मोठा प्रकल्प असलेल्या मानार (बारुळ) प्रकल्पात १२७.४४ दलघमीनुसार ९२.२१ टक्के पाणीसाठा झाला आहे.

यासोबतच जिल्ह्यातील नऊ मध्यम प्रकल्पात १२८.८६ दलघमीनुसार ९२.६५ टक्के पाणीसाठा झाला आहे. चार कोल्हापुरी बंधाऱ्यांत १.५२ दलघमीनुसार २०.४४ टक्के पाणीसाठा आहे, ८० लघू प्रकल्पांत १४१.५१ दलघमीनुसार ८१.८९ टक्के पाणीसाठा आहे. नऊ उच्च पातळी बंधाऱ्यांत १३७.९१ दलघमीनुसार ७२.६६ टक्के पाणीसाठा आहे.

याबरोबरच नांदेड जिल्ह्याशेजारील परभणी जिल्ह्यातील येलदरी प्रकल्पात ८०२.५४ दलघमीनुसार ९९.११ टक्के पाणीसाठा झाला आहे. तर सिद्धेश्‍वर प्रकल्पात ५७.६६ दलघमीनुसार ७१.१५ टक्के पाणीसाठा झाला आहे. तसेच यवतमाळ जिल्ह्यातील उर्ध्व पेनगंगा (इसापूर) प्रकल्पात ९४८.२७ दलघमीनुसार ९८.३६ टक्के साठा झाल्याची माहिती पाटबंधारेकडून देण्यात आली.