Kharif Sowing : अहिल्यानगर जिल्ह्यात खरिपाचा सहा लाख हेक्टरवर पेरा

Ahilyanagar News : अहिल्यानगर जिल्ह्यात मे महिन्यात झालेल्या पावसाने पेरणी लवकर सुरू झाली. मात्र मध्यंतरी पावसाच्या उसंतीने पेरणीत अडथळे आले. आतापर्यंत खरिपाची ६ लाख ३५५ हेक्टरवर (८३.८२ टक्के) पेरणी झाली आहे. यंदा सरासरीच्या मक्याचे क्षेत्र वाढण्याचा तर मूग, उडीद, तूर, कापूस, बाजरीचे क्षेत्र कमी होण्याची शक्यता दिसत आहे.

जिल्ह्यात खरिपाचे ७ लाख १६ हजार २०९ हेक्टर सरासरी क्षेत्र आहे. यंदा अहिल्यानगर जिल्ह्यात मे महिन्यात मोठ्या प्रमाणात पाऊस झाला. यंदा तब्बल मे मधील पावसाची २२० मिलिमीटर पावसाची नोंद झाली. जून महिन्यातही मृग जोरदार बरसला.

त्यामुळे पेरण्याला लवकर सुरुवात झाली. जूनच्या शेवटच्या आठवड्यापर्यंत पेरण्या वेगात सुरू होत्या. मात्र गेल्या पंधरा दिवसांपासून पावसाने दडी मारली. पावसाअभावी कोरडवाहू भागात पीक करपू लागल्याची स्थिती होती. आता दोन दिवसांपासून जोरदार नसला तरी हलका, रिमझिम पाऊस पडत असल्याने पिकांना दिलासा मिळाला आहे.

कृषी विभागाकडून मिळालेल्या माहितीनुसार, आतापर्यंत अहिल्यानगर जिल्ह्यात ६ लाख ३५५ हेक्टरवर (८३.८२ टक्के) पेरणी झाली आहे. पाऊस सुरुवातीला आला तर मुग, उडीद आणि तुरीचे क्षेत्र वाढते हे ठरलेले असते. यंदा मात्र हे क्षेत्रही फारसे वाढलेले दिसत नाही.

आतापर्यंत उडदाची ६२ हजार २२७ हेक्टरवर, मुगाची ४६ हजार ६१९ हेक्टरवर पेरणी झाली आहे. तुरीची पेरणी सरासरीच्या ९४.४५ टक्के झाली आहे. कापसाची लागवडही सरासरीच्या ७९.३१ टक्के झाली आहे.

पेरणी (हेक्टरमध्ये) कंसात सरासरी क्षेत्र

भात ः ६०५० (१८७४५)

बाजरी ः ५१ हजार ३२४ (८९,६२९)

मका ः ८६ हजार ६९८ (७७,९९९)

तूर ः ६१ हजार ००१ (६४ हजार ५८५)

मूग ः ४६ हजार ६१९ (५१ हजार ९८०)

उडीद ः ६२ हजार २२७ (६७, ५९५)

भुईमूग ः ३ हजार ६२८ (६ हजार ६००)

सोयाबीन ः १ लाख ५६ हजार २५६ (१ लाख ७८ हजार ५०६)

कापूस ः १ लाख २३ हजार १८८ (१ लाख ५५ हजार ३२९)