Electricity Connection : मराठवाड्यात ८ लाख नवीन वीज जोडण्या

Chhatrapati Sambhajinagar News : महावितरण छत्रपती संभाजीनगर प्रादेशिक कार्यालय अंतर्गत मराठवाड्यात १ डिसेंबर २०१८ ते १ डिसेंबर २०२३ या पाच वर्ष कालावधीत सर्व वर्गवारीतील सरासरी ७ लाख ९७ हजार ८२१ ग्राहकांना नवीन वीज जोडण्या देण्यात आल्या आहेत. यामध्ये विशेषतः ५ लाख ९३ हजार १७८ घरगुती वीज जोडण्याचा समावेश आहे.

महावितरण वीज ग्राहकांना तत्पर वीज सेवा देण्याबरोबरच मागेल त्यांना वीज जोडणी देण्याचा हा प्रयत्न आहे. नवीन वीज जोडणीसाठी नागरिकांनी आवश्यक कागदपत्रांसह महावितरणच्या जवळच्या कार्यालयाशी संपर्क साधण्याचे आवाहनही महावितरणने केले आहे. महावितरण दर्जेदार, गुणवत्तापूर्ण व ग्राहकाभिमुख सेवा देण्यासाठी सदैव आधुनिक सुविधांसह सज्ज आहे.

त्यानुसार महावितरणचे अध्यक्ष तथा व्यवस्थापकीय संचालक लोकेश चंद्र यांनी नव्या वीज जोडणीसाठीचे अर्ज तातडीने निकाली काढण्याचे आदेश दिले आहेत. ग्राहकांनी नव्या वीज जोडणीसाठी अर्ज केल्यानंतर महावितरणचे कर्मचारी जागेची पाहणी करून किती शुल्क भरायचे याची माहिती देतात.

त्यानुसार पायाभूत सुविधा उपलब्ध असलेल्या ठिकाणी शहरी भागातील ज्या ग्राहकांनी शुल्क भरले त्यांना चोवीस तासांत तर ग्रामीण भागात ४८ तासांत वीज जोडणी देण्यावर भर देण्यात आला. वीज जोडणी आवश्यक असल्यास त्या ठिकाणच्या जागेवर वीजबिलाची थकित थकबाकी नसली पाहिजे.

वीज चोरीचा दंड प्रलंबित असू नये. नवीन वीज जोडणीसाठी दलाल अथवा मध्यस्थाशी संपर्क साधू नये. नागरिकांनी वीज जोडणीसाठी आवश्यक कागदपत्रांसह जवळच्या महावितरणच्या कार्यालयाशी संपर्क साधण्याचे आवाहन महावितरणतर्फे करण्यात आले आहे.

मंडल कार्यालय नवीन जोडण्या

छत्रपती संभाजीनगर परिमंडल २ लाख ७७ हजार ००८

लातूर परिमंडल २ लाख ८३ हजार८२३

नांदेड परिमंडल २ लाख ३६ हजार ९९०

मराठवाडा एकूण ७ लाख ९७ हजार ८२१