District Development Plan : जिल्हा नियोजन समिती बैठकीत ७७३ कोटींच्या नियतव्ययास मंजुरी

Chhatrapati Sambhajinagar : जिल्हा नियोजन समितीच्या बैठकीत २०२४-२५ साठी ७७३ कोटी ९० लाख रुपयांच्या नियतव्ययास मंजुरी देण्यात आली. जिल्हा नियोजन समितीची बैठक शनिवारी (ता. ३) नियोजन सभागृहात पार पडली. अध्यक्षस्थानी पालकमंत्री अब्दुल सत्तार होते.

राज्याचे गृहनिर्माण मंत्री अतुल सावे, लोकसभा सदस्य खासदार कल्याण काळे, विधानसभा सदस्य आमदार प्रदीप जयस्वाल, आमदार रमेश बोरनारे, आमदार उदयसिंह राजपूत, आमदार प्रशांत बंब तसेच जिल्हाधिकारी दिलीप स्वामी, मनपा आयुक्त जी. श्रीकांत, जिल्हा परिषदेचे मुख्य कार्यकारी अधिकारी विकास मीना, पोलीस आयुक्त प्रवीण पवार, पोलीस अधीक्षक मनिष कलवानिया तसेच सर्व यंत्रणाप्रमुख आदी उपस्थित होते.

बैठकीच्या सुरुवातीला आधीच्या बैठकीच्या इतिवृत्ताच्या अनुपालन अहवालावर चर्चा होऊन त्यास मान्यता देण्यात आली. गेल्या आर्थिक वर्षात झालेल्या ६७२ कोटी ११ लाख ३७ हजार रुपयांच्या खर्चासही मान्यता देण्यात आली. त्यानंतर २०२४-२५ या आर्थिक वर्षासाठी नियतव्यय सादर करण्यात आला. त्यात सर्वसाधारण योजनांसाठी ६६० कोटी रुपये, विशेष घटक योजनांसाठी १०४ कोटी रुपये तर आदिवासी उपयोजना बाह्यक्षेत्रासाठी ९ कोटी ९० लाख रुपये अशा एकूण ७७३ कोटी ९० लाख रुपयांच्या नियतव्ययास मान्यता देण्यात आली. पालकमंत्री सत्तार म्हणाले, की सर्व यंत्रणांनी सर्व कामे वेळेत व गुणवत्तापूर्ण करावीत. तसे न झाल्यास जबाबदारी निश्चित करून कारवाई करण्यात येईल

नियोजन समितीच्या झालेल्या चर्चेत खासदार कल्याण काळे, उपस्थित आमदार, सदस्य यांनी सहभाग घेऊन सूचना मांडल्या. जिल्हा नियोजन अधिकारी भारत वायाळ यांनी नियोजन आराखड्याचे सादरीकरण केले. महिला व बालविकास विभागामार्फत गर्भलिंगनिदान विरोधात जनजागृतीसाठी जिल्हाधिकारी दिलीप स्वामी यांच्या संकल्पनेतून माझी मुलगी या कवितेचे जनजागृती पोस्टर विमोचन उपस्थित मान्यवरांच्या हस्ते करण्यात आले.