Takari Irrigation Scheme : ताकारी योजनेवर राहणार पाणीवापर संस्थांचे नियंत्रण

Sangli News : ताकारी योजनेच्या लाभक्षेत्रात एकूण ७३ पाणी वापर संस्थांची स्थापना झाली असून, यामधील ५३ पाणीवापर संस्थांची निवडणूक प्रक्रिया पूर्ण झाली आहे. यापूर्वी आठ संस्थांकडे लाभक्षेत्र हस्तांतरण प्रक्रिया झाली होती. सध्या आणखी आठ संस्थांकडे लाभक्षेत्र हस्तांतरण प्रक्रिया करण्यात आली.

ताकारी सिंचन योजनेच्या लाभक्षेत्रात सुमारे ४०० एकर लाभ क्षेत्रासाठी एक पाणी वापर संस्था स्थापन करण्यात आली आहे. या पाणीवापर संस्थांना सिंचन व्यवस्था, पाणीआवर्तन नियोजन, पाणी नियोजन, पाणीपट्टी आकारणी व वसुली इत्यादीबाबत अधिकार असणार आहेत. सध्या ताकारी पाणीपट्टी एकरी ७ हजार ३०० रुपये आहे.

पाणीवापर संस्थांचे संचालक मंडळ निवडणूक पद्धतीने निवडले जात आहेत. त्यामुळे लाभक्षेत्रातील शेतकऱ्यांना महत्त्व राहणार आहे. तसेच या पाणीवापर संस्थांत शेतकऱ्यांना महत्त्व व अधिकार असणार आहे.

पाणीवापर संस्था योग्य पद्धतीने कारभार करीत नसल्यास त्यांना बदलण्याचा अधिकार लाभक्षेत्रातील शेतकऱ्यांना असणार आहे. ताकारी योजनेच्या लाभक्षेत्रात कार्यरत असणाऱ्या पाणी वापर संस्थांना वेगळे महत्त्व प्राप्त होणार आहे. तसेच योजना सुरळीत सुरू ठेवण्यासाठी पाणी वापर संस्था महत्त्वाची भूमिका बजविणार आहेत.

दुसऱ्या टप्प्यातील संस्थांकडे हस्तांतर

सध्या वांगी, शिवणी, अमरापूर, सोनकिरे, येवलेवाडी, चिंचणी या गावच्या संस्थांकडे लाभक्षेत्र हस्तांतर केले आहे. तसेच यापूर्वी तडसर येथील ५ संस्था, पाडळी आणि चिंचणी येथील एका संस्थेकडे लाभक्षेत्र हस्तांतर केले आहे.