Ladki Bahin Yojana: ५० लाखांवर लाडक्या बहीणींना मिळणार डच्चू; अपात्र बहीणींची संख्या वाढणार

Pune News: ‘मुख्यमंत्री माझी लाडकी बहीण’ योजनेतून सरकारने महीलांना डच्चू देण्यास सुरुवात केली आहे. आधीच सरकारने २६ लाख ३४ हजार महिलांना अपात्र ठरवले आहे. सरकार अजूनही महीलांच्या पात्रतेची पडताळणी करत आहे. यापुढील तपासणीत हा आकडा ५० लाखांवर जाण्याची शक्यता आहे, अशी माहिती महिला व बालविकास मंत्री आदिती तटकरे यांनी दिली.

मंत्री आदिती तटकरे यांनी नुकतेच दिलेल्या माहितीनुसार, ‘मुख्यमंत्री माझी लाडकी बहीण’ योजनेतून महिलांना आर्थिक सहाय्य देण्याचा सरकारचा उद्देश आहे. सध्या राज्यातील २ कोटी ३४ लाख महिलांना दरमहा १,५०० रुपये लाभ या योजनेतून मिळत आहे. शासनाने आता पात्र लाभार्थ्यांनाच मदत मिळावी यासाठी अर्जांची चौकशी सुरू केली आहे. ज्यामुळे आता केवळ पात्र महिलांनाच आता या योजनेचा लाभ मिळणार आहे.

शासनाने योजनेचा गैरवापर थांबवण्यासाठी केंद्र सरकारकडून प्राप्तिकर भरलेल्या कुटुंबांची माहिती मागवून अर्जांची चौकशी सुरू केली आहे. या चौकशीत महिलांच्या अर्जांची तपासणी करून त्यांना अपात्र ठरवले जात आहे. ज्यामुळे केवळ पात्र महिलांनाच आता या योजनेचा लाभ मिळणार आहे असेही स्पष्ट केले आहे.

महिलांना अपात्र ठरवण्यामागील प्रमुख कारणे

उत्पन्नाचे निकष : ज्या महिलांच्या कुटुंबाचे वार्षिक उत्पन्न २.५० लाख रुपयांपेक्षा जास्त आहे, त्यांना योजना लाभासाठी अपात्र ठरवले जात आहे.

इतर सरकारी योजनांचा लाभ : ‘ पीएम किसान योजना’ किंवा तत्सम योजनेतून नियमित आर्थिक मदत घेणाऱ्या महिलांना ‘लाडकी बहीण’ योजनेतून वगळले जात आहे.

चुकीची माहिती : अर्ज करताना चुकीची माहिती दिली किंवा आवश्यक कागदपत्रे सादर न केल्यास त्या अर्जदार महिलांना अपात्र ठरवले जात आहे.

पुरुष अर्जदार : ही योजना केवळ महिलांसाठी असताना काही पुरुषांनी चुकीच्या पद्धतीने अर्ज करून लाभ घेतल्याचे समोर आले आहे. त्यांना अपात्र करण्यात आले आहे.

आधार लिंक नसलेले बँक खाते : योजना लाभ मिळवण्यासाठी दिलेले बँक खाते आधार कार्डशी लिंक नसल्यास, अशा खात्यांवर लाभ अडतो आणि त्यामुळे अपात्रता ठरते.