Koyna Dam : कोयना धरणातून ४२ हजार क्युसेकने पाण्याचा विसर्ग सुरू

Satara News : कोयना धरणाच्या पाणलोट क्षेत्रात पावसाचा जोर वाढला असल्याने पाण्याच्या विसर्ग वाढविण्यात आला. मंगळवारी (ता. ३०) दुपारी १२ वाजता सांडव्यावरून ४० हजार व पायथा वीजगृहातून २१०० क्युसेक, असा एकूण ४२ हजार १०० क्युसेक विसर्ग सुरू आहे. यामुळे कोयना नदीच्या पाणीपातळीत वाढ होणार आहे.

जिल्ह्यातील प्रमुख धरणात पावसाचा जोर काहीसा कमी असलातरी पावसाची आवक होत आहे. यामुळे कोयना, कण्हेर, तारळी धरणांतून विसर्ग सुरू ठेवण्यात आला आहे. धरण क्षेत्रातील कोयना १०७, नवजा ९९, महाबळेश्वर १५८ मिलिमीटर पावसाची नोंद झाली आहे. धरणात ३५,४०१ क्युसेक आवक होत आहे. यामुळे धरण व्यवस्थापनाकडून विसर्गात वाढ करण्याचा निर्णय घेतला.

मंगळवारी दुपारी १२ वाजता सांडव्यावरून ४० हजार व पायथा वीजगृहातून २१०० क्युसेक असा एकूण ४२ हजार १०० क्युसेक विसर्ग सुरू आहे. कोयना धरणात मंगळवारी सकाळी आठपर्यंत ८५.३७ टीएमसी (८१.११ टक्के) पाणीसाठा झाला आहे. कण्हेर व तारळी धरणातून विसर्ग कमी केला आहे. कण्हेर धरणातून ४६११, तारळी ३५२६, धोम-बलकवडी ८०० व उरमोडी ३०० क्युसेक पाण्याचा विसर्ग सुरू आहे.

धोम मंगळवारी सायंकाळी चार वाजता ५००० क्युसेक विसर्ग सुरू करण्याची शक्यता आहे. तसेच उरमोडी धरणातूनही चार वाजता ४००० विसर्गात वाढ करण्यात येणार आहे. यामुळे कृष्णा व उरमोडी नदीच्या पाणीपातळीत वाढ होणार आहे.