Kharif Perani: पुणे विभागात ३६ टक्के पेरण्या आटोपल्या

Pune News : मे महिन्यात झालेल्या जोरदार पावसामुळे शेतकऱ्यांना दिलासा मिळाला आहे. त्यानंतर पावसाने दिलेल्या उघडिपीमुळे खरीप पेरण्यांना वेग आला आहे. पुणे विभागात सरासरीच्या बारा लाख ५६ हजार ४३९ हेक्टरपैकी सुमारे चार लाख ५१ हजार ५०७ हेक्टर म्हणजेच ३६ टक्के पेरण्या झाल्या आहेत. परंतु भात रोपवाटिकेची कामे खोळंबली असून अधूनमधून पडत असलेल्या पावसामुळे पिकांना दिलासा मिळत आहे.

मागील महिन्यात मॉन्सूनपूर्व पावसाने दमदार हजेरी लावल्याने सर्वत्र पाणीच पाणी झाले असून ओढे-नाले, बंधारे ओसंडून वाहत आहेत. यामुळे शेतकरी वर्गामध्ये समाधानाचे वातावरण आहे. यातच मागील काही दिवसांपासून पावसाने उघडीप दिल्याने जिरायती जमिनीला वाफसा येत असल्याने खरीप हंगामातील पेरणीच्या कामास गती मिळत आहे. मागील काही दिवसांपासून रखडलेली खरीप हंगामातील पेरणीपूर्व मशागतीची कामे करण्यात बळीराजा गुंतला आहे.

बैलजोडी तसेच ट्रॅक्टरच्या साह्याने शेतजमिनीची नांगरणी, कुळवणी, पेरणीची लगबग सुरू झाली आहेत. पावसामुळे मशागत करणे सोपे जात आहे. या वर्षी चांगला पाऊस झाल्याने खरीप हंगामातील पिकांची वाढ चांगली होईल, अशी शेतकऱ्यांना आशा आहे. खरीप हंगामात बाजरी, भुईमूग, सोयाबीन, मूग, चवळी, हुलगा, घेवडा, वाटाणा आदींसह अन्य कडधान्यांची पेरणी सुरू झाली आहे. यंदा पावसाने वेळेआधी सुरुवात केल्यामुळे खरीप हंगाम चांगला होईल, अशी आशा शेतकऱ्यांमधून व्यक्त होत आहे.

गेल्या आठवड्यात पुणे, नगर आणि सोलापूर जिल्ह्यांच्या काही भागांत हलका ते मध्यम स्वरूपाचा पूर्वमोसमी पाऊस झाला होता. विभागात एक ते २० जूनपर्यंत या कालावधीत नगरमध्ये ७६.१ मिलिमीटर, पुणे १८२.६ मिलिमीटर, तर सोलापुरात ५८.७ मिलिमीटर पाऊस पडला. त्यामुळे शेतकऱ्यांनी खरिपाची वेगात तयारी सुरू केली आहे. आठवड्यापूर्वी अनेक भागांत शेतकऱ्यांनी पेरणीसाठी शेत नांगरणी व वखरणी करून ठेवले होती. मात्र, सात ते आठ दिवसांपासून कोकण आणि मध्य महाराष्ट्राचा पश्चिम भाग वगळता पावसाने उघडीप दिली आहे. त्यामुळे शेतकऱ्यांनी पुन्हा शेतीचे कामे सुरू केल्याची स्थिती आहे.

विभागात अहिल्यानगरमध्ये खरीप हंगामातील पेरणीस सुरुवात झाली आहे. भात पीक पुनर्लागवड झाली असून पीक उगवण अवस्थेत आहे. बाजरी, मका पीक उगवण अवस्थेत आहे. त्याचबरोबर जिल्ह्यामध्ये तूर, मूग, उडीद, भुईमूग, सोयाबीन व कापूस पिकांची पेरणी झाली असून पिके उगवण अवस्थेत आहेत. अकोले तालुक्यामध्ये रोपवाटिका प्रक्षेत्रावर एक हजार ८३१ हेक्टर क्षेत्रावर भात रोपे तयार करण्यात आली आहेत. पुणे जिल्ह्यात खरीप हंगामातील पेरणीस सुरुवात झाली आहे. पेरणी झालेले बाजरी तसेच मका पीक उगवण अवस्थेत आहे. मूग पिकाची उगवण झाली असून दोन पानांच्या अवस्थेत आहे.

सोलापुरात खरीप हंगामातील पेरणी झालेले बाजरी पीक उगवण अवस्थेत असून पीक परिस्थिती समाधानकारक आहे. मका पीक उगवण ते रोप अवस्थेत, मूग व उडीद पीक उगवण ते फुटव्याच्या अवस्थेत, तूर पीक उगवण अवस्थेत, सोयाबीन पीक उगवणी ते रोप अवस्थेत आहे.

रोपवाटिकेची कामे खोळंबली

पुणे जिल्ह्याच्या पश्चिमेकडील भोर, वेल्हा, मावळ, मुळशी उत्तरेकडील खेड, जुन्नर, आंबेगाव, तर नगर जिल्हातील अकोले तालुक्यात प्रामुख्याने भाताची लागवड केली जाते. त्यासाठी कृषी विभागाकडून बियाणांचा पुरवठा कृषी विभागाने केला आहे. भात लागवडीसाठी दरवर्षी मोठ्या प्रमाणात भात रोपवाटिका तयार होतात. यंदाही मोठ्या प्रमाणात भात रोपवाटिका होण्याची शक्यता आहे. मात्र, जूनचे वीस दिवस झाले असल्याने या काळात दमदार पाऊस झाला आहे. पुणे जिल्ह्यात सुमारे ५ हजार ६४ हेक्टरवर रोपवाटिका झाल्या आहेत. परंतु सततच्या पावसामुळे रोपवाटिकेची कामे अजूनही काही प्रमाणात खोळंबली आहेत.

पुणे विभागात झालेली पेरणी, हेक्टरमध्ये

जिल्हा सरासरी क्षेत्र पेरणी झालेले क्षेत्र टक्के

नगर ७,१६,२०९ २,६८,८११ ३८

पुणे २,०२,२६३ ३९,१६३ १९

सोलापूर ३,३७,९६७ १,४३,५३३ ४२

एकूण १२,५६,४३९ ४,५१,५०७ ३६

पुणे विभागात १ ते २० जून या कालावधीत पडलेला पाऊस (मिमी) :

जिल्हा सरासरी प्रत्यक्ष पडलेला

पाऊस टक्के

नगर १०८.२ ७६.१ ७०

पुणे १७६.२ १८२.६ १०३

सोलापूर १०२ ५८ ५७