Fish Conservation : मत्स्योत्पादन, संवर्धनाची ३५ केंद्रे बंद

Sangli News : पुरेसे मनुष्यबळ, सुविधांचा अभाव तलावांची दुरुस्ती या साऱ्यांमुळे गेल्या पंधरा ते वीस वर्षांपासून ६७ मत्स्योत्पादन व संवर्धन केंद्रांना घरघर लागली आहे. परिमाणी, राज्यातील ३५ मत्स्त्योत्पादन व संवर्धन केंद्रे बंद पडली आहेत. केंद्र दुरुस्ती करून सुविधा आणि मनुष्यबळ देण्याची मागणी मच्छीमार सहकारी संस्था करत आहेत. मात्र मत्स्य व्यवसाय विभागाने त्याकडे काणाडोळा केला आहे.

मच्छीमार संस्थांना सुमारे ८२ कोटी १० लाख मत्स्य बोटुकलीची आवश्यकता आहे. या संस्थांना दर्जेदार आणि कमी किमतीत मत्स्य बोटुकली (बीज) मिळावी, यासाठी मत्स्य व्यवसाय विभागाने मत्स्यबीज मत्स्योत्पादन, संवर्धन केंद्र सुरू केली आहेत.

राज्यात ३२ मत्स्योत्पादन केंद्रे, २ कोळंबी बीज उत्पादन केंद्रे, ३२ मत्स्यबीज संवर्धन केंद्रे आणि २ कोळंबी संवर्धन केंद्रे अशा एकूण ६७ केंद्रांत मत्स्य आणि कोळंबीचे संवर्धन आणि उत्पादन केले जाते. मात्र या केंद्रातून ७ कोटी १९ लाख ८५ इतकेच मत्स्यबीजाचे उत्पादन होते.

बहुतांश मत्स्य विभागाच्या मत्स्योत्पादन, संवर्धन केंद्रात वीजपुरवठा नाही. तसेच तलावाची दुरुस्ती केलेली नाही. अनेक तलावांत पुरेसे पाणी सोडण्यात येत नाही. अवर्षण भागातील तलावात पुरेसा पाणीसाठा होत नाही. त्यासाठी पाटबंधारे आणि जिल्हा परिषदेचा विभाग याकडे दुर्लक्ष करत आहे. त्यामुळे मत्स्योत्पादन आणि संवर्धन केंद्रांना फटका बसला आहे.

प्रत्येक जिल्ह्यानुसार मत्स्योत्पादन, संवर्धन केंद्रांत पदे निर्माण केली आहेत. त्यानुसार पद भरती केली जाते. सहायक आयुक्त या केंद्राचा कारभार पाहतात. केंद्राच्या ठिकाणी मत्स्य क्षेत्रक, लिपिक, शिपाई अशी विविध पदे आहेत.

मात्र, अनेक केंद्रात ही पदेही रिक्त आहेत. त्यामुळे केंद्रे बंद ठेवावी लागली आहेत. संस्थांना दर्जेदार बीज मिळत नाहीत. परिणामी, ६७ पैकी ३५ केंद्रे बंद पडली आहेत. सुरू असलेल्या केंद्रांतून आवश्यक बीज उत्पादन होऊ शकत नसल्याने पुरवठा करणे कठीण बनले आहे. सर्व केंद्रे सुरू करावी, अशी मागणी सातत्याने होत आहे.

विभागनिहाय मत्स्यबीज निर्मिती केंद्रे

विभाग केंद्रे बंद केंद्रे

पुणे १५ ८

अमरावती १० ३

लातूर ७ २

छत्रपती संभाजीनगर ६ ४

नागपूर १७ ८

नाशिक ६ ६

मुंबई ६ ४

एकूण ६७ ३५