Maharashtra Dam Storage: राज्यातील धरणांत ३२.५५ टक्के पाणीसाठा

Ahilyanagar News: राज्यात लहान, मध्यम व मोठे एकूण एकत्रित सुमारे २९९७ इतकी धरणे असून, या वर्षीच्या जून महिन्याच्या पहिल्या पंधरवड्याअखेर १८ जून अखेर या सर्व धरणांमध्ये सुमारे ३२.५५ टक्के इतका म्हणजेच ४६५.६३ टीएमसी इतका उपयुक्त पाणीसाठा निर्माण झाला आहे, अशी माहिती जलसंपदा विभागाचे सेवानिवृत्त अभियंता हरिश्‍चंद्र चकोर यांनी दिली.

श्री. चकोर म्हणाले, की गतवर्षीच्या तुलनेत यंदा जून महिन्याच्या पहिल्या पंधरवड्यात राज्यातील धरणांमध्ये चांगला पाणीसाठा झाला आहे. कोकण विभागात एकूण १७३ धरणे आहेत. त्यामध्ये आजमितीला ४७.३४ टीएमसी म्हणजेच ३६.१८ टक्के इतका उपयुक्त पाणीसाठा उपलब्ध आहे. नाशिक विभागात ५३७ इतकी लहान-मोठी धरणे असून, त्यामध्ये ६६.६९ टीएमसी म्हणजेच ३१.८६ टक्के उपयुक्त पाणीसाठा उपलब्ध आहे.

पुणे विभागात एकूण ७२० धरणे असून, त्यामध्ये आज १६७.९२ टीएमसी म्हणजेच ३०.८५ टक्के उपयुक्त पाणीसाठा उपलब्ध आहे. मराठवाडा विभागामध्ये एकूण ९२० धरणे असून, त्यामध्ये सुमारे ७९.०१२ टीएमसी म्हणजेच ३०.८५ टक्के इतका उपयुक्त पाणीसाठा उपलब्ध आहे. अमरावती विभागामध्ये २६४ धरणे असून, त्यामध्ये ५२.३४ टीएमसी म्हणजेच ३९.१८ टक्के आणि नागपूर विभागात ३८३ धरणे असून, या धरणांमध्ये ५२.२० टीएमसी म्हणजेच ३२.०८ टीएमसी उपयुक्त पाणीसाठा उपलब्ध आहे.

बृहन्मुंबई महानगरपालिकेकडे असलेल्या पाच धरणांमध्ये सुमारे २.९९ टीएमसी म्हणजेच १६.१८ टक्के इतका उपयुक्त पाणीसाठा उपलब्ध आहे. ठाणे महानगरपालिकेला पाणीपुरवठा करणाऱ्या बारवी धरणांत सुमारे ४.४१ टीएमसी म्हणजेच ३६.८७ टक्के पाणीसाठा आहे. नवी मुंबईसाठी पाणीपुरवठा करणाऱ्या मोराबे आणि हटवणे धरणांत एकूण सुमारे ४.८३ टीएमसी म्हणजेच सरासरी ३६.७६ टक्के पाणीसाठा उपलब्ध आहे.

राज्यातील प्रमुख धरणातील एकूण पाणीसाठा

- उजनी ः ९२.९९ टीएमसी ७९.३१ टक्के (उपयुक्त ः ३१.६०० टीएमसी ५८.९८ टक्के)

- कोयना ः २५.७० टीएमसी २४.४२ टक्के (उपयुक्त ः २२.९७ टीएमसी २२.९४ टक्के

- जायकवाडी ः ४८.८० टीएमसी ४७.५० टक्के (उपयुक्त ः २२.७३ टीएमसी २९.६६ टक्के)