Vidhansabha Election : विधानसभा निवडणुकीबाबत २९ ला निर्णय

Solapur News : ‘‘मराठा समाज मागास आहे, हे सिद्ध झाले आहे. आमच्या मागणीनुसार आम्हाला ओबीसीतून आरक्षण हवे आहे, पण सरकारची आरक्षण देण्याची काही लक्षणे दिसत नाहीत.

आता पुन्हा २५ आॕगस्टपर्यंत वाट पाहणार आहोत, त्यानंतर आम्हीही मोकळे आहोत. येत्या २९ आॕगस्टला आगामी विधानसभा निवडणुकीत राज्यातील सर्व जागांवर उमेदवार उभा करण्याबाबत निर्णय घेऊ, असे मराठा आंदोलक मनोज जरांगे पाटील यांनी बुधवारी (ता.७) येथे आयोजित शांतता रॕलीत सांगितले.

मराठा आरक्षणावरील शांतता रॕलीच्या दुसऱ्या टप्प्यात पश्चिम महाराष्ट्रातील शांतता रॕलीला सोलापुरातून बुधवारी सुरुवात झाली. या वेळी बोलताना मनोज जरांगे म्हणाले, की मराठा आरक्षणाला विरोध करणाऱ्या नेत्यांना आगामी निवडणुकीत आम्ही पक्के पाडू,

आम्ही आमचा हक्क मागतोय, तुम्ही या पुढाऱ्यांना भुलू नका. पक्ष, नेता यापेक्षा आपली जात मोठी म्हणा, पण आपल्यातलेच काही लोक स्वतःला ९६ कुळी समजणारे समाजावर उलटत आहेत.