Santosh Deshmukh Case : राज्यातील २८ हजार ग्रामपंचायती पुढील तीन दिवस बंद; संतोष देशमुख यांच्या हत्येच्या निषेधार्थ ग्रामपंचायतींचे आंदोलन

Beed Sarpanch Murder Case : बीड येथील मस्साजोग गावचे सरपंच संतोष देशमुख यांच्या हत्येला २३ दिवस होत आहेत. अद्याप आरोपींचा सुगावा पोलिसांना लागलेला नाही. यामुळे राज्यातील ग्रामपंचायतींनी आंदोलनाचे अस्त्र उपसले आहे. यामुळे तब्बल २८ हजार ग्रामपंचायतींचे कामकाज आजपासून तीन दिवस बंद राहणार आहे. दरम्यान आज (ता.३१) धनंजय मुंडे यांचे निकटवर्तीय असलेले वाल्मिक कराड सीबीआय पोलिसांकडे आत्मसमर्पण केले आहे.

सरपंच संतोष देशमुख यांच्या हत्येनंतर वाल्मिक कराड हेच मास्टरमाइंड असल्याचा आरोप अनेक राजकीय नेत्यांसह देशमुख यांच्या कुटुंबियांनी केला होता. पण कराड यांच्यासह तीन आरोपी फरार आहेत. यामुळे राज्यात ठिकठिकाणी निषेध व्यक्त करण्यात आला आहे. बीडमध्ये सर्वपक्षीय मूक मोर्चा देखील काढण्यात आला होता. पण आता ७ दिवसांचे सरकारला अल्टिमेटम देताना राज्यभरातील ग्रामपंचायतींनी कामकाज बंद आंदोलन छेडले आहे. जे आजपासून पुढील तीन दिवस असणार आहे.

राज्यभरात काम बंद

सरपंच संतोष देशमुख यांच्या निर्घृण हत्येप्रकरणी कारवाई व्हावी, या मागणीसाठी राज्यभरात ग्रामपंचायतींनी काम बंद आंदोलन पुकारलं आहे. या आंदोलनात २७,९५१ ग्रामपंचायती सहभागी होणार आहेत.

या जिल्ह्यांचा सहभाग नाही

दरम्यान, ग्रामपंचायतींनी पुकारलेल्या निषेध मोर्चात सांगली, सातारा, कोल्हापुरातील ग्रामपंचायती सहभागी झालेल्या नाहीत. तर देशमुख हत्येच्या निषेधार्थ सरपंच संघटनांनी ९ जानेवारीला बंद पुकारण्याचा निर्धार केला आहे.

नेमकी मागणी काय?

सरपंच संतोष देशमुख यांची अपहरण करून निघृण हत्या करण्यात आली होती. ही घटना ताजी असतानाच धाराशिव जिल्ह्यातील एका सरपंचावर प्राणघातक हल्ला झाला होता. यामुळे सरपंच संघटना आक्रमक झाल्या असून शासनाने कठोर पावले उचलावीत अशी मागणी संघटनांनी केली आहे.

तर सरपंचांचा सुरक्षेसाठी कायदा करावा, देशमुख यांच्या हत्येतील आरोपींना तातडीने अटक करत मास्टर माईंडचा शोध घ्यावा, सरपंच तथा ग्रामपंचायत पदाधिकाऱ्यांना कायदेशीर संरक्षण देण्यात यावे, अशा मागण्या सरपंच संघटनांनी केल्या आहेत. याबाबतचे निवेदनही महाराष्ट्र प्रदेश सरपंच संघटनेतर्फे राज्याचे मुख्यमंत्री देवेंद्र फडणवीस यांना देण्यात आले आहे.