MSP Procurement Center : परभणी, हिंगोली जिल्ह्यांत पणन महासंघ अंतर्गत २७ खरेदी केंद्र

Parbhani News : केंद्र शासनाच्या आधारभूत किंमत खरेदी योजनेअंतर्गत नाफेडच्या वतीने खरीप हंगाम २०२४-२५ मध्ये हमीभावाने (प्रतिक्विंटल ७५५०रुपये) तूर विक्रीसाठी परभणी जिल्ह्यातील १२ आणि हिंगोली जिल्ह्यातील १५ मिळून एकूण २७ खरेदी केंद्रांवर ऑनलाइन शेतकरी नोंदणी सुरू झाली असून, २२ फेब्रुवारीपर्यंत नोंदणी सुरू राहणार आहे.

गुरुवार ता.१३ फेब्रुवारी ते १३ मे २०२५ या कालावधीत तूर खरेदी केली जाणार आहे, अशी माहिती जिल्हा पणन अधिकारी कुंडलिक शेवाळे यांनी दिली. केंद्र शासनाने जाहीर केल्यानुसार २०२४-२५ या वर्षासाठी तुरीला प्रतिक्विंटल ७५५० रुपये किमान आधारभूत किंमत जाहीर केली आहे.

यंदा हमीभावाने तूर खरेदीसाठी परभणी जिल्ह्यासाठी प्रतिहेक्टरी १०.५० क्विंटल उत्पादकता निश्‍चित करण्यात आली असून, १० हजार २२५ टन तूर खरेदीचे उद्दिष्ट आहे. हिंगोली जिल्ह्यासाठी प्रतिहेक्टरी ११.५० क्विंटल उत्पादकता निश्‍चित करण्यात आली असून, ८ हजार ८६५ टन तूर खरेदीचे उद्दिष्ट आहे.

ऑनलाइन नोंदणीकरिता सोबत २०२४-२५ मधील ७-१२ उताऱ्यावर ऑनलाइन पीकपेरा नोंद असावी, आधार कार्ड झेरॉक्स, बँक पासबुकची झेरॉक्स आणावी. बँक पासबुकवर शेतकऱ्यांचे नाव, खाते क्रमांक, आयएफएससी कोड स्पष्ट असावा.

जनधन बँक खाते क्रमांक किंवा पतसंस्थेतील खाते क्रमांक देऊ नये. संबंधित तालुक्यातील केंद्राच्या ठिकाणी शेतकऱ्यांनी नोंदणी करावी, असे आवाहन कुंडलिक शेवाळे यांनी केले आहे.

परभणी -हिंगोली जिल्हे तूर हमीभाव खरेदी केंद्र ठिकाण, संपर्क...