Crop Damage Compensation : अतिवृष्टिबाधितांच्या मदतीसाठी २०४ कोटींचा निधी

Yavatmal News : पूरस्थितीमुळे शेतीपिके व शेतजमिनीचे नुकसान झालेल्या बाधितांना मदत देण्यासाठी जिल्ह्याला २०४ कोटी ८७ लाख रुपयांच्या निधीस शासनाने मंजुरी दिली आहे. अमरावती विभागात जिल्ह्याला सर्वाधिक निधी मंजूर झाला असून, या निधीमुळे जिल्ह्यातील नुकसानग्रस्तांना दिलासा मिळणार आहे.

राज्यात नैसर्गिक आपत्तिबाधितांच्या मदतीसाठी राज्य आपत्ती प्रतिसाद निधीमधून निश्‍चित केलेल्या दरानुसार एकूण एक हजार ७१ कोटी ७७ लाख रुपये इतका निधी वितरित करण्यास शासनाने मंजुरी दिली आहे. याबाबतचा जीआर महसूल व वनविभागाकडून बुधवारी (ता.४) जारी करण्यात आला.

नैसर्गिक आपत्तीमुळे शेतीपिकांचे नुकसान झाल्यास पुढील हंगामामध्ये उपयोगी पडावे, यासाठी शेतकऱ्यांना अनुदान स्वरूपात एका हंगामात एक वेळेस याप्रमाणे राज्य आपत्ती प्रतिसाद निधीमधून विहित दराने मदत देण्यात येते. राज्य आपत्ती प्रतिसाद निधीच्या इतर मान्य बाबींकरिता देखील विहित दराने मदत देण्यात येते.

अतिवृष्टी, पूर यांसारख्या नैसर्गिक आपत्तीमुळे राज्यात विविध जिल्ह्यांत होणाऱ्या शेतीपिकांच्या नुकसानीकरिता व इतर नुकसानीसाठी बाधितांना मदत प्रदान करण्यास शासनाची मान्यता देण्यात आली आहे.

विभागीय आयुक्तांनी जून ते जुलै या महिन्यांत अतिवृष्टी व पूर यामुळे झालेल्या शेतीपिकांच्या व शेतजमिनीच्या नुकसानीसाठी निधी मागणीचा प्रस्ताव शासनास सादर केला होता. त्यानुसार निधी वितरित करण्यास शासनाची मंजुरी देण्यात आली आहे.

अडीच लाख शेतकरी बाधित

जिल्ह्यात अतिवृष्टी व पूरपरिस्थितीमुळे दोन हेक्टरपर्यंत बाधित क्षेत्र दोन लाख १७ हजार २४१.५७ हेक्टर एवढे आहे. त्यात बाधित शेतकऱ्यांची संख्या दोन लाख ६३ हजार ६०९ आहे. बाधित शेतकऱ्यांच्या मदतीसाठी १८५ कोटी दहा लाख रुपयांचा निधी वितरित करण्यास मंजुरी मिळाली आहे. शेतजमिनीच्या नुकसानग्रस्त दहा हजार ७५७ हेक्टर ७३ आर. क्षेत्रासाठी १९ कोटी ७६ लाख ६३ हजार रुपये इतका निधी वितरित करण्यास मंजुरी देण्यात आली आहे.