Water Bill : नाशिक जिल्ह्यात १४ कोटी पाणीपट्टी थकित

Nashik News : नांदगाव, दाभाडी व देवळा येथील प्रादेशिक पाणीपुरवठा योजनांची १३ कोटी ९७ लाख रुपयांची पाणीपट्टी थकित आहे. थकबाकी वसुलीसाठी जिल्हा परिषद प्रशासनाने गटविकास अधिकाऱ्यांना स्मरणपत्र देऊन त्वरित कारवाईचे आदेश दिले.

नांदगाव व ५६ खेडी, दाभाडी व १२ गावे, देवळा व नऊ गावे प्रादेशिक पाणीपुरवठा योजनांचे दहा महिन्यांत वसुलीचे प्रमाण हे फक्त २.७५ टक्के राहिले आहे. त्यामुळे जिल्हा परिषदेला देखभाल व दुरुस्तीचा खर्च, योजनेची वीजबिले, कर्मचारी यांचे वेतन व भत्ते अदा करणे अवघड झाले.

कार्यकारी अभियंता, पाणी व्यवस्थापन देखभाल व दुरुस्ती पथक यांनी दिलेल्या अहवालानुसार गटस्तरावरून पाणीपट्टी वसुलीबाबत कोणतीही ठोस स्वरूपात कार्यवाही करण्यात येत नाही.

योजनेच्या देखभाल व दुरुस्तीचा खर्च तसेच योजनेची वीजबिले, कर्मचारी यांचे वेतन व भत्ते, रसायने, वारंवार उद्‌भवणारी देखभाल दुरुस्ती ही जिल्हा परिषदेमार्फत होणाऱ्या पाणीपट्टीतूनच केली जाते. थकीत पाणीपट्टी मोठ्या प्रमाणात असल्याने योजनेचा खर्च भागविणे जिल्हा परिषद प्रशासनास जिकिरीचे झाले आहे.