Animal Husbandry : भोरमध्ये पशुसंवर्धन विभागात १३ रिक्त पदे

Pune News : गेल्या काही वर्षांपासून भोर तालुक्यातील पशुसंवर्धन विभागात रिक्त पदांची संख्या वाढत आहे. राज्य पशुसंवर्धन विभागाची १५ पैकी तब्बल १३ पदे रिक्त असल्यामुळे जिल्हा परिषद पशुसंवर्धन विभागाकडे अतिरिक्त भार दिला आहे. मात्र, तालुक्याची भौगोलिक परिस्थिती आणि पशुधनाच्या संख्येचा विचार करता ही रिक्त पदांची संख्या मोठी आहे. त्यामुळे भोर तालुक्यातील जनावरांच्या आरोग्याचा प्रश्न ऐरणीवर आहे.

ही रिक्त पदे तातडीने भरण्याची मागणी होत आहे. तालुक्यात राज्य पशुसंवर्धन विभागाचे १५ व जिल्हा परिषद पशुसंवर्धन विभागाचे ११ दवाखाने कार्यरत आहेत. दोन्ही विभाग मिळून सहायक आयुक्त, पशुधन विकास अधिकारी, सहायक पशुधन विकास अधिकारी, पशुधन पर्यवेक्षक मिळून एकूण ३३ पदे मंजूर आहेत. मंजूर असलेले सहायक पशुधन विकास अधिकारी पद एक व पशुधन पर्यवेक्षक १२ पदे, अशी १३ पैकी १३ पदे रिक्त आहेत.

सध्या पशुधन विकास अधिकारी ही दोनच पदे कार्यरत आहेत. राज्य शासनाची १३ व जिल्हा परिषदेची ३, अशी १६ पदे रिक्त आहेत. तर मंजूर २५ पैकी शिपायांची १३ पदे रिक्त आहेत. भोर तालुका लघू पशू चिकित्सालयाअंतर्गत येणाऱ्या भोर, राजगड, पुरंदरमधील मंजूर असणाऱ्या २५ पदांपैकी फक्त पशुधन विकास अधिकारी ही दोन पदे कार्यरत आहेत.

रिक्त असलेली पदे

सहायक आयुक्त एक, पशुधन विकास अधिकारी पद भरलेली आहेत. सहा. पशुधन विकास अधिकारी १ पद, पशुधन पर्यवेक्षक १२ ही पदे रिक्त आहेत. शिपाई पदे १२ मंजूर, पण त्यातील ८ पदे रिक्त आहेत. पशुधन पालकांनी आपल्या पशुधनाच्या कानातील बिल्ला मारून त्याची नोंद आपल्या कार्यक्षेत्रातील दवाखान्यातील डॉक्टरांकडून भारत पशुधन अॅपवर नोंद करणे अनिवार्य आहे.

भोर तालुक्यातील पशुधन (२०२० च्या गणनेनुसार)

प्रकार -- संख्या

पक्षी वर्ग -- १२,८८३

गाय वर्ग -- १२,१४०

म्हैस वर्ग -- ८,९९०

शेळी --- ४८८४

मेंढी --- ३,७२०

एकूण --- ४२,६१७