Rain Update : बावड्यात १२३ मिलिमीटर पावसाची नोंद

Pune News : पुणे जिल्ह्यात पावसासाठी पोषक वातावरण आहे. त्यामुळे अनेक ठिकाणी दमदार पाऊस कोसळत आहे. तर काही ठिकाणी मुसळधार पडत आहे. गुरुवारी (ता. २६) सकाळी आठपर्यंत इंदापुरातील बावडा येथे सर्वाधिक १२३ मिलिमीटर पाऊस पडला असून जिल्ह्यातील धरणक्षेत्रात पावसाचा जोर अधिक आहे. त्यामुळे जवळपास १६ धरणांतून पाण्याचा विसर्ग सुरू करण्यात आला आहे. त्यामुळे नद्या दुथडी भरून वाहत आहेत.

गेल्या पाच ते सहा दिवसांपासून जिल्ह्यातील विविध भागांत कमीअधिक पाऊस पडत आहे. या पावसामुळे पिकांचे नुकसान होत असले तरी रब्बी पेरण्यासाठी व भात पिकांसाठी हा पाऊस पोषक असल्याचे शेतकऱ्यांचे म्हणणे आहे. हवेलीतील पुणे वेधशाळा, केशवनगर, खडकवासला येथे ११३ मिमी पाऊस झाला.

तर वाघोली ५८ मिमी, उरुळीकांचन, खेडमध्ये ३६ मिमी, तर थेऊर, कोथरूड, भोसरी, चिंचवड, कळस, हडपसर येथे हलका पाऊस पडला. मुळशीतील मुठे येथे ४१ मिमी, तर मालेत ३६ मिमी, तर पौड, घोटावडे, थेरगाव, पिरंगुट येथे तुरळक सरी बरसल्या. भोरमधील वेळू ४६ मिमी, भोलावडे ३२ मिमी, तर नसरापूर, किकवी, आंबवडे, संगमनेर, निगुडघर, मावळमधील वडगाव मावळ, तळेगाव, काले, कार्ला, खडकाळा, लोणावळा, शिवणे येथे हलका पाऊस पडला.

वेल्हा येथे ९५ मिमी, विंझर ४१ मिमी, तर आंबवणे, पानशेत येथे हलका पडला. जुन्नरमधील नारायणगाव येथे ५३ मिमी, तर जुन्नर, वडगाव आनंद, निमगाव सावा, बेल्हा, राजूर, डिंगोरे, आपटाळे, ओतूर येथे तुरळक सरी कोसळल्या. खेडमधील पिंपळगाव येथे ३२ मिमी, तर वाडा, राजगुरुनगर, कुडे, पाईट, चाकण, आळंदी, कन्हेरसर, कडुस येथे हलका, तर आंबेगावमधील आंबेगाव येथे ४५ मिमी, तर घोडेगाव, कळंब, पारगाव, मंचर येथे चांगलाच शिडकावा झाला.

शिरूरमधील न्हावरा येथे ८० मिमी, कोरेगाव येथे ५८ मिमी, तर टाकळी, वडगाव, मलठण, तळेगाव, रांजणगाव, पाबळ, शिरूर येथे हलका, बारामतीतील माळेगाव, पणदरे, वडगाव, लोणी, सुपा, मोरगाव, उंडवडी येथे हलका पाऊस पडला. इंदापुरातील भिगवण, काटी येथे ६१ मिमी, तर इंदापूर ५०, लोणी ४२ मिमी, तर निमगाव, अंथुर्णी, सणसर येथे तुरळक, दौंडमधील पारगाव येथे ८० मिमी, तर बोरीभडक ५४, वरवंड ३९, पाटस ३३, यवत ३६ मिमी, तर कडेगाव, राहू, देऊळगाव, रावणगाव, दौंड, खामगाव, वडगाव बांदे, बोरी पार्धी येथे हलका, पुरंदरमधील भिवंडी येथे ३१ मिमी तर सासवड, कुंभारवळण, जेजुरी, परिंचे, राजेवाडी, वाल्हा येथे तुरळक सरी बरसल्या.पावसामुळे पिकांना दिलासा मिळत असला तरी काही ठिकाणी पावसामुळे पिकांचे नुकसान वाढत आहे.