Gokul Doodh Sangh : ‘गोकुळ’कडून दूध उत्पादकांना ११३ कोटींचा दिवाळी फरक

Kolhapur News : ‘‘कोल्हापूर जिल्हा सहकारी दूध उत्पादक संघातर्फे (गोकुळ) म्हैस व गाय अंतिम दूध दर फरकापोटी ११३ कोटी ६६ लाख रुपयांची रक्कम प्राथमिक दूध संस्थांच्या बँकेतील खात्यावर शुक्रवारी (ता. ११) जमा करण्यात येणार आहे.

ही ‘गोकुळ’च्या लाखो दूध उत्पादकांना दिलेली दीपावली भेट आहे,” अशी माहिती ‘गोकुळ’चे चेअरमन अरुण डोंगळे यांनी दिली. डोंगळे म्हणाले, की गेल्या आर्थिक वर्षात दूधपुरवठा केलेल्या म्हशीच्या दुधास सरासरी प्रतिलिटर २ रुपये ५० पैसे व गायीच्या दुधास सरासरी प्रतिलिटर १ रुपये ५० पैसे याप्रमाणे दूध संस्थांना अंतिम दूध दर फरक देण्यात येणार आहे.

यापैकी प्रतिलिटर ०.२५ पैसेप्रमाणे प्राथमिक दूध संस्थांच्या नावावर डिबेंचरसाठी गोकुळकडे जमा करण्यात येणार आहेत. दूध उत्पादकांना निव्वळ प्रतिलिटर म्हैस दुधास २ रुपये २५ पैसे व गाय दुधास प्रतिलिटर १ रुपये २५ पैसे अंतिम दूध दर फरक देण्यात आला आहे.

यावर्षी संघाने म्हशीच्या दुधाकरिता ५८ कोटी ६१ लाख ५८ हजार रुपये तर गायीच्या दुधाकरिता ३४ कोटी ७० लाख ९३ हजार रुपये इतका दूध दर फरक व दर फरकावर ६ टक्के प्रमाणे होणारे व्याज ३ कोटी २० लाख ३५ हजार व डिंबेचर व्याज ७.७० टक्के प्रमाणे ८ कोटी ९६ लाख ६६ हजार रुपये व शेअर्स भांडवलावर ११ टक्के प्रमाणे लाभांश ८ कोटी १६ लाख ८९ हजार रुपये असे एकूण ११३ कोटी ६६ लाख रुपये इतकी रक्कम स्वतंत्र दूध बिलातून दूध संस्थांच्या खात्यावर बँकेत जमा केली जाणार आहे.

या दर फरकाचा लाभ कोल्हापूर जिल्ह्यातील तसेच सीमा भागातील ‘गोकुळ’च्या ७,९२७ दूध संस्थांच्या सुमारे ५ लाख ५० हजार दूध उत्पादक सभासदांना होणार आहे. दूध उत्पादकांना देण्यात येणाऱ्या एकूण ११३ कोटी ६६ लाख रुपये अंतिम दूध दर फरकाव्यतिरिक्त गोकुळने या आर्थिक वर्षामध्ये जवळजवळ ४२ कोटी रुपये पशुवैद्यकीय उपचार, कृत्रिम रेतन, वैरण विकास, मायक्रोट्रेनिंग, दूध संस्था इमारत बांधकाम अनुदान, मिल्को टेस्टर खरेदी, कॉम्प्युटर खरेदी, शैक्षणिक सहल, दूध उत्पादकांना किसान विमा पॉलिसी, भविष्य कल्याण निधी, जातिवंत म्हैस खरेदी अनुदान व वासरू संगोपनावरील अनुदान व सेवासुविधांवर खर्च केले आहेत, असे डोंगळे यांनी सांगितले.