Animal Husbandry Department : सिंधुदुर्ग जिल्ह्यात पशुसंवर्धन विभागाची १०३ पदे रिक्त

Sindhudurg News : जिल्ह्यात पशुसंवर्धन विभागाला मंजूर अधिकारी, कर्मचाऱ्यांच्या २१५ पदांपैकी १०३ पदे रिक्त आहेत. यामध्ये ७१ पशुधन अधिकाऱ्यांचा समावेश असल्याने शेतकऱ्यांना त्याचा फटका बसत आहे. सिंधुदुर्ग जिल्ह्यातील श्रेणी दोनचे सर्व पशुदवाखाने आता श्रेणी एकमध्ये वर्ग केले आहेत. राज्य आणि जिल्हा परिषदेच्या दवाखान्याचे एकत्रीकरण केले आहे.

जिल्ह्यात ९५ पशुवैद्यकीय दवाखाने आहेत. ७ फिरते दवाखाने मंजूर होते. परंतु तेही बंद करण्यात आले आहेत. ९५ पशुवैद्यकीय दवाखान्याकरिता एकूण २१५ अधिकारी, कर्मचाऱ्यांची पदे मंजूर आहेत. यामध्ये सहाय्यक आयुक्त २०, पशुधन विकास अधिकारी ९१, पशुधन पर्यवेक्षक ९६,आणि पशुधन विकास अधिकारी गट ब -८ या पदांचा समावेश आहे.

परंतु प्रत्यक्षात जिल्ह्यात ११२ पदेच भरलेली असून १०३ पदे रिक्त आहेत. अनेक भागातील दवाखान्यांमध्ये पशुधन अधिकारीच नसल्यामुळे शेतकऱ्यांची कुचंबणा होत आहे. एका पशुधन विकास अधिकाऱ्याकडे तीन-चार पशुसंवर्धन दवाखान्यांचा अतिरिक्त कार्यभार असल्याने कामाचा ताण वाढला आहे.

पशुसंवर्धनसोबत पशुगणना आणि इतर कामे कर्मचाऱ्यांना करावी लागत असल्याने जनावरांवर उपचार करण्याचे मुख्य काम बाजूला पडत असल्याचे चित्र आहे. जिल्ह्यात सुमारे एक लाख ६० हजारांच्या जवळपास पशुधन आहे.

पदाचे नाव मंजूर पदे भरलेली रिक्त पदे

सहाय्यक आयुक्त २० ६ १४

पशुधन विकास अधिकारी ९१ २० ७१

पशुधन विकास अधिकारी (गट ब)८ १ ७

पशुधन पर्यवेक्षक ९६ ८५ ११

एकूण २१५ ११२ १०३