Urea Fertilizer : संरक्षित साठ्यातील एक हजार टन युरियाचे वितरण

Nanded News : खरीप हंगाम २०२५ मध्ये शेतकऱ्यांच्या मागणीनुसार पेरणीसाठी सुरुवातीस आवश्यक असलेल्या खते वेळेत उपलब्ध होण्यासाठी जिल्हा प्रशासनाच्या आदेशानुसार जिल्हा पणन अधिकारी कार्यालयाकडे ३६१० टन युरिया खताचा संरक्षित साठा करण्यात आला होता. यातील एक हजार टन युरिया जिल्ह्यातील सोळा तालुक्यांना वितरित करण्यात आला आहे, अशी माहिती कृषी विभागाच्या सूत्राने दिली.

जिल्ह्यात खरीप हंगामाच्या पेरण्या सुरू आहेत. शेतकरी पिकांना खते देण्यासाठी युरियाची मागणी करत आहेत. परंतु अनेक ठिकाणी शेतकऱ्यांना युरिया खत मिळत नसल्याचे दिसून येत होते. कृषी निविष्ठा विक्री केंद्रावर युरिया उपलब्ध नसल्यामुळे शेतकऱ्यांना माघारी फिरावे लागत आहे. सध्या शेतकरी हळद, केळी, ऊस व कपाशीला युरिया खत देतात. परंतु या महत्त्वाच्या काळातच शेतकऱ्यांना खत मिळत नव्हते.

यामुळे शेतकरी तालुका तसेच जिल्हास्तरावर शासकीय कार्यालय गाठून युरिया खत उपलब्ध करून देण्याची मागणी करत होते. यामुळे जिल्हा प्रशासनाने संरक्षित साठा केलेल्या ३६१० टन युरियापेकी जिल्हा पणन अधिकारी कार्यालयाकडून एक हजार टन युरिया खत जिल्ह्यात वितरित करण्याचे निर्देश दिले होते. यानुसार कृषी विभागाने तालुकानिहाय मागणीनुसार विवरण तयार करून युरिया खतसाठा खुला केला आहे. हा खतसाठा शेतकऱ्यांना लवकर उपलब्ध व्हावा, यासाठी कृषी विभागाने नियोजन केले आहे.

शासनाच्या निर्देशानुसार वितरण प्रक्रिया पारदर्शक पद्धतीने पार पाडण्यासाठी संबंधित तालुक्यांच्या कृषी अधिकारी, पंचायत समितीमार्फत ई-पॉस मशिनच्या माध्यमातून विक्रेत्यांकडून खतांचे वितरण करण्यात यावे. शेतकऱ्यांना त्यांच्या मागणीनुसार योग्य प्रमाणात खत उपलब्ध करून देण्यासाठी स्थानिक अधिकाऱ्यांनी समन्वय साधण्याचे आदेश कृषी विभागाकडून देण्यात आले आहेत.

तालुकानिहाय वितरित केलेला युरिया खत (विरतण टनांत)

धर्माबाद ५०, नायगाव ६०, देगलूर ६०, मुदखेड ५०, किनवट १००, भोकर ६०, उमरी ५०, हदगाव ९०, कंधार ६०, लोहा ६०, मुखेड ८०, बिलोली ६०, अर्धापूर ५०, नांदेड ५०, माहूर ६० व हिमायतनगर ६०.