Agriculture Dispute : पारगावात बांधावरील १०० तंटे निकालात

Pune News : राज्यात महात्मा गांधी तंटामुक्ती अभियानामुळे पोलीस प्रशासनावरील बराचसा ताण कमी होत असून बरीचशी प्रकरणे गावातच मिटवून समझोता होत आहे. गेल्या दीड वर्षांत १०० हून अधिक बांधावरील तंटे मिटविले गेले आहेत.

ही समिती गावगाड्यात सामाजिक सलोखा निर्माण करण्यावर भर देत असल्याने नागरिकांनी समाधान व्यक्त केले आहे. गावचा विकास हा गावच्या शांततेवर अवलंबून असतो. ग्रामीण भागात प्रतिष्ठेचे व समांतर न्यायदानाचे कार्य करणारे महत्त्वाचे पद म्हणजे तंटामुक्ती अध्यक्ष हे आहे. तंटामुक्ती अभियानामुळे

अगदी २० ते २५ वर्षांपासूनचे वादात असलेले तंटेसुद्धा मिटलेले आहेत. ग्रामीण भागातील सर्वांत जास्त तंटे हे शेतीच्या बांधाच्या बाबतीत घडत आहेत. अनेक तंटामुक्ती समितीच्या म्हणण्यानुसार जवळपास ८० टक्के तटे हे शेती बांधाचेच असतात. तंटामुक्तीचे अध्यक्ष व समितीला, असे तंटे त्या ठिकाणी बांधावर जाऊन खातरजमा करूनच मिटवावे लागतात.

ते मिटवण्यात त्यांना बहुतांशी यश येत असते. मोठी लोकसंख्या असणाऱ्या गावच्या तंटामुक्ती अध्यक्ष व समितीला यासाठी दररोज काही वेळ द्यावा लागतो. या आणि अनेक छोट्या-मोठ्या तक्रारी गावातच तडजोडीने सामंजस्याने तंटामुक्ती समिती मिटवीत आहे. शासनाचे हे अभियान सार्थकी ठरल्याचे जाणवत आहे. त्यामुळे नक्कीच पोलीस प्रशासणावरचा ताण कमी होत आहे.