Nashik News : शेतकऱ्यांकडून टोमॅटोची खरेदी (Tomato Procurement) करणाऱ्या व्यापाऱ्याने एक कोटी ८० लाखांची फसवणूक (Fraud With Tomato Farmer) केल्याचा प्रकार नुकताच घडला. हे टोमॅटो व्यापारी शेतकऱ्यांचे पैसे न देता फरारी झाल्याने शेतकरी हलावदिल झाले आहेत.
सोमवारी (ता. २७) शेतकऱ्यांनी बाजार समितीचे सचिव अरुण काळे यांना निवेदन देत पैसे मिळून देण्याची मागणी केली. या व्यापाऱ्याविरोधात पोलिस ठाण्यात फसवणुकीची तक्रार दाखल झाली आहे.
पेठ रोडवरील शरदचंद्र पवार मार्केट यार्डात जिल्ह्याभरातील विविध भागांतून टोमॅटो विक्रीसाठी येतो. टोमॅटो व्यापारी नौशाद फारुकी व शमशाद फारुकी यांनी सप्टेंबर २०२२ ते ऑक्टोबर २०२२ यादरम्यान शेतकऱ्यांकडून टोमॅटो खरेदी केले. मात्र त्याचे पैसे दिले नाहीत.
ज्या शेतकऱ्यांना त्यांनी धनादेश दिले, ते बाउन्स झाले. या व्यापाऱ्याकडून १७९ शेतकऱ्यांना सुमारे १ कोटी ८० लाख रुपये येणे बाकी आहे. व्यापारी पैसे देण्यास टाळाटाळ करीत होते. ते सध्या फरार आहेत. व्यापाऱ्यांवर कायदेशीर कारवाई करून त्यांच्या गाळे व मालमत्तांचा लिलाव करून शेतकऱ्यांचे पैसे मिळवून द्यावेत, अशी शेतकऱ्यांची मागणी आहे.
व्यापाऱ्याचा गाळा विकणार
नाशिक बाजार समिती प्रशासनास या प्रकरणी माहिती उपलब्ध झाली. व्यापाऱ्याने विकलेला गाळा ताब्यात घेतला. त्याची विक्रीप्रक्रिया सुरू केली आहे.
तसेच व्यापारी आपल्या खासगी मिळकती विकत असल्याबाबत बाजार समितीस माहिती मिळताच दस्त नोंदणी कार्यालयात पत्रव्यवहार करीत माहिती मागविली आहे.
याबाबत माहिती उपलब्ध करून बाजार समिती कायद्यांतर्गत ‘५७ अ’ प्रमाणे कारवाई करणार असल्याची माहिती बाजार समिती प्रशासनाने दिली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
