Raju Shetti : ‘स्वाभिमानी’ सहा ठिकाणी लढणार लोकसभा निवडणूक

Sangli News : ‘‘शेतकऱ्यांच्या प्रश्‍नांना वाचा फोडायची असेल, तर लोकसभेशिवाय पर्याय नाही. त्यामुळे स्वाभिमानी शेतकरी संघटनेतर्फे राज्यातील सहा ठिकाणी आगामी लोकसभा निवडणूक लढू. मतदार संघात लोकांची मागणी पाहूनच उमेदवार निश्‍चित केले जातील, अशी घोषणा स्वाभिमानी शेतकरी संघटनेचे नेते राजू शेट्टी यांनी केली.

सांगली येथे गुरुवारी (ता.२५) आयोजित पत्रकार परिषदेत श्री. शेट्टी यांनी स्पष्ट केले. ते म्हणाले, ‘‘शेतकऱ्यांचे प्रश्‍न आजही सुटलेले नाहीत. त्यामुळे त्या प्रश्‍नांना वाचा फोडायची असल्याने लोकसभेसाठी कोल्हापूर, सांगली, माढा, परभणी, बुलडाणा या ठिकाणी उमेदवार उभे करण्यात येतील.

हातकणंगले मतदार संघात स्वतः निवडणूक लढविणार आहे. रविकांत तुपकर यांचीही उमेदवारी निश्‍चित केली आहे. त्याशिवाय अन्य मतदार संघांत लोकांची मागणी पाहून उमेदवार निश्‍चित केले जातील. सांगलीत महेश खराडे किंवा लोकांच्या मागणीतून उमेदवार दिला जाईल.’’

‘‘राज्यात सहकार व अनेक क्षेत्रांत मोठा भ्रष्टाचार आहे. चौकशी करायची असेल तर या सर्वांचीच करा. फक्त विरोधक आहेत म्हणून चौकशी करू नका. यामध्ये माझीसुद्धा चौकशी करायची असेल तरी खुशाल करा.

मात्र भाजपमध्ये येण्यासाठी दबाव तंत्र वापरू नका. राज्यकर्त्यांनी शेतकऱ्यांच्या प्रश्‍नाकडे दुर्लक्ष केले आहे. शेतकरी आत्महत्या करत आहे. परंतु राज्यकर्त्यांकडून त्यांना कोणतीही मदत किंवा विचारपूस केली जात नाही. त्यामुळे आता या राज्यकर्त्यांच्या विरोधात शेतकरी आवाज उठवेल,’’ असा इशारा शेट्टी यांनी दिला.

कोल्हापुरात ४ जून रोजी पहिले नांगरट साहित्य संमेलन

‘‘कोल्हापूर शिवाजी विद्यापीठातील वि. स. खांडेकर भाषा भवन सभागृहात ४ जून रोजी पहिले नांगरट साहित्य संमेलन होईल. या संमेलनाचे उद्‍घाटक वात्रटीकाकार व साहित्यिक रामदास फुटाणे असतील. तर प्रसिद्ध ग्रामीण साहित्यिक कविवर्य डॉ. विठ्ठल वाघ हे संमेलनाध्यक्ष आहेत,’’ असेही श्री. शेट्टी म्हणाले.