सुप्रिया सुळेंचा थेट केदारांना फोन; राष्ट्रवादीचे जोध झाले सभापती

ॲग्रोवन वृत्तसेवा
नागपूर : जिल्हा परिषदेत काँग्रेस-राष्ट्रवादीची आघाडी असली, तरी सभापतिपद देण्यास काँग्रेसकडून सातत्याने नकार दिला जात असल्याने राष्ट्रवादीच्या नेत्या खासदार सुप्रिया सुळे (Supriya Sule) यांनी थेट आमदार सुनील केदार (Sunil Kedar) यांना फोन लावला. त्यानंतर राष्ट्रवादीचे बाळू जोध यांचे नाव सभापतिपदासाठी जाहीर करण्यात आले.

जिल्हा परिषदेच्या चार सभापतिंसाठी मंगळवारी (ता. १) निवडणूक झाली. कॉंग्रेस व राष्ट्रवादीचे कॉंग्रेसचे सर्व सदस्य एकाच ठिकाणी होते. काँग्रेसने सभापतिपदासाठी आपल्या उमेदवाराची नावे जाहीर केली; मात्र राष्ट्रवादीकडून वेगवेगळ्या नावांचे प्रस्ताव येत होते.

त्यावर कोणाचेच एकमत होत नव्हते. केदार शेकापचे समीर उमप यांच्यासाठी आग्रही होते. त्यांना राष्ट्रवादीच्या कोट्यातून जागा मिळाली होती; मात्र माजी गृहमंत्री अनिल देशमुख यांचा यास विरोध होता.
विशेष म्हणजे जिल्हा परिषदेच्या सार्वत्रिक निवडणुकीनंतर राष्ट्रवादीने उपाध्यक्षपद देण्याची मागणी केली; मात्र ती केदारांनी फेटाळून लावली होती. त्यानंतर सभापतिपदही देण्यास नकार दिला होता.