Sugarcane Crushing : खानदेशात ऊस गाळप हंगाम पूर्णत्वाकडे

अॅग्रोवन वृत्तसेवा
जळगाव ः खानदेशात ऊस गाळप (Sugarcane Crushing) पूर्ण होत आले आहे. फक्त काही कारखान्यांचीच तोडणी सुरू आहे. सुमारे १९ लाख टनांवर ऊस गाळप मागील आठवड्यापर्यंत झाले आहे. यंदा गाळपाची गती चांगली राहिली आहे.

सध्या पाऊस आहे, पण पावसापूर्वीच कमाल क्षेत्रातील ऊस तोडणी पूर्ण झाली होती. ही तोडणी पूर्ण होत आली आहे. या महिन्याच्या अखेरिस किमान ९५ ते ९७ टक्के ऊस गाळप पूर्ण होईल, असे दिसत आहे.

सर्वाधिक गाळप नंदुरबार जिल्ह्यातील समशेरपूर (ता. नंदुरबार) येथील खासगी कारखान्याने केले आहे. त्यापाठोपाठ जळगाव जिल्ह्यातील घोडसगाव (ता. मुक्ताईनगर) व चहार्डी (ता. चोपडा) येथील कारखान्याचे गाळप झाले आहे.

नंदुरबार जिल्ह्यात एक सहकारी व दोन खासगी कारखाने सुरू होते. तसेच तळोदा तालुक्यात खांडसरीदेखील कार्यरत आहे.

धुळ्यात एकही कारखाना सुरू नाही. परंतु जिल्ह्यातून जळगाव व नंदुरबारात ऊस पाठवणूक झाली आहे. साक्री तालुक्यात नाशिकमधील कारखान्याने ऊस तोडणी केली आहे.

यंदा ऊस गाळप परतीचा पाऊस लांबल्याने उशिरा सुरू झाले. पण व्यत्यय न आल्याने गाळप गतीने सुरू होते. मागील हंगामात अनेक शेतकऱ्यांच्या उसाची तोडणी एप्रिलअखेरही झालेली नव्हती. तसेच एप्रिलअखेरीस ऊस गाळप सुमारे १७ लाख टन झाले होते.

परंतु यंदा मार्चच्या तिसऱ्या आठवड्यातच ऊस गाळप सुमारे १९ लाख टन झाले आहे. सध्या पाऊस सुरू आहे. नंदुरबारमधील दोन कारखाने मध्य प्रदेशातूनही ऊस खरेदी करतात. या कारखान्यांच्या कामावर काहीसा परिणाम झाला आहे.

जळगाव जिल्ह्यात चहार्डी येथील कारखान्याचे गाळप मागील आठवड्यातही वेगात सुरू होते.