Onion Rate Crisis : पाच एकर कांद्यात फिरवला रोटर

आशिष निंबोरे

Onion Rate Crisis मिरजगाव, ता. कर्जत ः कांदा लागवडीतून (Onion Cultivation) आर्थिक स्थिती सुधारेल, या आशेने मोठ्या प्रमाणात शेतकरी कांद्याचे पीक घेत आहेत. मात्र, बाजारात मोठ्या प्रमाणात कांदा (Onion Rate) आल्याने भाव कोसळले आहेत.

मजुरीचा खर्चही निघत नसल्याने एका शेतकऱ्याने आपल्या पाच एकर कांदा पिकांत रोटाव्हेटर (Rotavator) फिरवून निषेध केला. कर्जत तालुक्यातील नागापूर येथील शेतकऱ्यांनी संताप व्यक्त करत कांदा पीक शेतातच मोडून टाकले. नगर जिल्ह्यात सध्या कांदा उत्पादक शेतकरी हतबल आहेत.

कर्जत तालुक्यातील मिरजगाव परिसरात मोठ्या संख्येने शेतकरी कांद्याकडे वळाले आहेत. पिकाला पोटच्या पोराप्रमाणे सांभाळत बी-बियाण्यांपासून खतांपर्यंत आणि लागवडीपासून काढणीपर्यंत अमाप खर्च करत आहेत.

मात्र, कांदा काढणीला आल्यावर भाव गडगडले आहेत. त्यामुळे मजुरीचा खर्चही शेतकऱ्यांना मिळेनासा झाला आहे. लेट खरिपात लागवड झालेल्या कांद्याची काढणी सुरु झाली आहे. काही शेतकऱ्यांनी खरपातील कांदा दराअभावी चाळीत साठवून ठेवला आहे.

बाजारभाव कोसळल्याने नागापूर (ता. कर्जत) येथील प्रगतिशील शेतकरी सुभाष निंबोरे यांनी काढणीला आलेल्या पाच एकर कांदा पिकात रोटाव्हेटर फिरवून निषेध नोंदविला.

लाखो रुपयांचा खर्च करून पदरी निराशा पडत असल्याने हळहळ व्यक्त केली जात आहे. चार ते सहा रुपयांनी कांदा मातीमोलाने विकावा लागत आहे.

त्यामुळे पीक शेतातून काढून बाजारपेठेत विक्रीसाठी नेणे परवडत नाही. त्यामुळे वैतागून जोमदार कांदा पिकावर रोटाव्हेटर फिरवला. सरकारला आता तरी जाग येईल आणि कांदा उत्पादकांना सरकार अनुदान स्वरूपात मदत करील, अशी अपेक्षा शेतकरी सुभाष निंबोरे यांनी व्यक्त केली.