Maharashtra Rain : राज्यात १८ ऑगस्टपासून पाऊस वाढणार; मराठवाडा, विदर्भात पाऊस सुरु होणार

Maharashtra Monsoon Update : राज्याच्या अनेक भागांमध्ये १८ ऑगस्टपासून पाऊस सुरु होईल, असा अंदाज हवामान विभागाने दिला. विदर्भ आणि मराठवाड्यातील काही भागांमध्ये जोरदार पावसाचा अंदाजही हवामान विभागाने वर्तविला.

माॅन्सूनचा आस असलेला कमी दबाचा पट्टा हिमालयाच्या पायथ्याशी कायम आहे. ईशान्य भारत आणि बंगालच्या उपसागराच्या पूर्वमध्य भागात चक्राकार वाऱ्याची स्थिती आहे. ही स्थिती समुद्रसपाटीपासून ४.५ ते ७.६ किलोमीटर उंचीवर आहे. ही स्थिती दक्षिणेकडे झुकलेली आहे. यामुळे बंगालच्या उपसागराच्या उत्तरेकडे कमी दाब क्षेत्राची निर्मिती होण्याचा अंदाज आहे.

उत्तर प्रदेश आणि शेजारच्या भागातही समुद्रसपाटीपासून ३.१ ते ५.८ किलोमीटर उंचीवर चक्राकर वाऱ्याची स्थिती आहे.

राज्यात पावसासाठी आज पोषक हवामान नव्हते. त्यामुळे बहुतांशी भागांमध्ये पावसाची उघडीप होती. तर काही ठिकाणी हलक्या सरी पडल्या. हवामान विभागाने आज राज्यात काही ठिकाणी हलक्या ते मध्यम स्वरुपाच्या पावसाचा अंदाज दिला. तर उद्यापासून विदर्भ आणि मराठवाड्यात पावसाचा जोर वाढण्याचा अंदाज आहे. हवामान विभागाने उद्या विदर्भातील अमरावती,

यवतमाळ, वर्धा, चंद्रपूर आणि गडचिरोली जिल्ह्यात ठिकठाकणी विजांसह जोरदार पावसाचा येलो अलर्ट दिला. तर मराठवाड्यातील नांदेड जिल्ह्यातही कही ठिकाणी जोरदार पावसाचा अंदाज दिला. मराठवाडा, मध्य महाराष्ट्र आणि कोकणातही ठिकठिकाणी हलक्या पावसाची शक्यता आहे.

हवामान विभागाने १८ ऑगस्ट आणि १९ ऑगस्ट रोजी विदर्भ आणि मराठवड्यातील काही जिल्ह्यांमध्येही पावसाचा येलो अलर्ट दिला.

या दोन्ही दिवशी संपूर्ण विदर्भासह मराठवाड्यातील छत्रपती संभाजीनगर, जालना, परभणी, हिंगोली आणि नांदेड जिल्ह्यात ठिकठिकाणी विजांसह जोरदार पावसाचा येलो अलर्ट हवामान विभागाने दिला.

तर खानदेशातील जळगाव जिल्ह्यातही काही ठिकाणी जोरदार पावसाचा येलो अलर्ट दिला. राज्याच्या इतर भागांतही ठिकठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज हवामान विभागाने दिला